तारे होटलहरूमा अब प्लास्टिकजन्य बोटलको प्रयोग गर्न नपाइने

संस्कृति, संस्कृति, पर्यटन तथा नागरिक उड्डयन मन्त्रालय अन्तर्गतको पर्यटन विभागले तारे होटलहरूमा प्लास्टिकजन्य बोटलसहितका पेय पदार्थमा रोक लगाएको छ। मंगलबार जारी गरिएको विज्ञप्तिमा विभागले चार तारे, पाँच तारे, र पाँच तारे डिलक्स स्तरका सबै रिसोर्टहरूमा प्लास्टिकजन्य बोटलहरूको प्रयोगमा रोक लगाइएको जानकारी दिएको छ।

तारे स्तरमा वर्गीकृत र इजाजत प्राप्त गरिएका होटल तथा रिसोर्टहरूमा प्लास्टिकजन्य बोटलको प्रयोग भइरहेको छ भन्ने जानकारी प्राप्त भएको छ। यसैले तत्कालका लागि कम्तिमा चार तारे वा सोभन्दा माथिल्लो स्तरका होटल र रिसोर्टहरूमा खानेपानीको लागि प्रयोग हुने प्लास्टिकजन्य बोटलमा रोक लगाइएको छ।

प्लास्टिकजन्य बोटलको प्रयोगले मानव स्वास्थ्य र वातावरणमा नकारात्मक प्रभाव पार्न सक्छ। यसैले, काँचका बोटल र अन्य धातुका भाँडाहरूको प्रयोग गरेर होटलका कोठा र रेष्टुरेन्टहरूमा पिउने पानीको व्यवस्था मिलाउन निर्देशन दिइएको छ।