साल्ट ट्रेडिङको नाफा घट्यो, जगेडा कोषमा १ अर्ब ३६ करोड सञ्चित

साल्ट ट्रेडिङ कर्पोरेशन लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ। पुस मसान्तसम्म कम्पनीले ३ करोड ५३ लाख रुपैयाँ खुद नाफा कमाएको छ, जुन गत वर्षको ३ करोड ५८ लाख रुपैयाँको तुलनामा १.२६ प्रतिशतले कम हो।

बिक्री आम्दानी घटेसँगै कम्पनीको खुद नाफामा गिरावट देखिएको हो। चालु आर्थिक वर्षको पहिलो छ महिनामा कम्पनीको बिक्री आम्दानी ३१.५५ प्रतिशतले घटेर ४ अर्ब ५८ करोड रुपैयाँमा सीमित भएको छ। अघिल्लो वर्ष यो रकम ६ अर्ब ६९ करोड रुपैयाँ थियो।

Ads

Ads

Ads

यता कम्पनीले वित्तीय लागतलाई २२ करोड ६४ लाख रुपैयाँबाट घटाएर २ करोड ८८ लाख रुपैयाँमा झारेको छ। त्यसैगरी कर्मचारी खर्च १७ करोड ५० लाखबाट घटेर १५ करोड ९९ लाख रुपैयाँमा सीमित भएको छ भने प्रशासनिक खर्च पनि १० करोड ३८ लाखबाट घटेर ७ करोड ६० लाख रुपैयाँ कायम भएको छ।

समीक्षा अवधिमा कम्पनीको प्रति सेयर आम्दानी २२ रुपैयाँ ५ पैसामा झरेको छ भने प्रति सेयर नेटवर्थ ३८४ रुपैयाँ ३० पैसा रहेको छ।

३२ करोड ७ लाख रुपैयाँ चुक्ता पूँजी रहेको यस कम्पनीको जगेडा कोषमा १ अर्ब ३६ करोड रुपैयाँ सञ्चित छ।