दोस्रो बजारका सेयरमा १५ दिने सूचना हटाउन सेबोन सकारात्मक

आधारभूत सेयरधनीले सेयर बिक्री गर्नुअघि १५ दिनअघि सूचना दिनुपर्ने व्यवस्थामा परिवर्तन गर्न नेपाल धितोपत्र बोर्ड (सेबोन) सकारात्मक देखिएको छ।

लगानीकर्तासँग करिब तीन घण्टा भएको छलफलमा हालको व्यवस्थालाई थप व्यावहारिक बनाउने विषयमा आवश्यक छलफल गरेर अघि बढ्न सेबोन तयार रहेको सहभागीहरूले बताएका छन्।

Ads

Ads

Ads

छलफलमा विशेषगरी दोस्रो बजारबाट खरिद गरिएको सेयर बिक्री गर्दा पनि १५ दिनअघि सूचना दिनुपर्ने व्यवस्थाबारे प्रश्न उठेको थियो। छलफलमा सहभागी लगानीकर्ताहरूले दोस्रो बजारबाट खरिद गरिएको सेयर बिक्री गर्दा सूचना दिनुपर्ने व्यवस्था हटाउनुपर्ने माग राखेका थिए। त्यस्तै, हालको व्यवस्थाअनुसार हाइड्रोपावरलगायत अन्य क्षेत्रका कम्पनीको ३ वर्षे प्रमोटर लकइन अवधि खुलेपछि बजारमा बिक्रीका लागि आउने सेयरका लागि ‘अफर फर सेल’ बजार सञ्चालन गर्नुपर्ने र त्यसका लागि छुट्टै विन्डोको व्यवस्था गर्नुपर्ने मागसमेत लगानीकर्ताहरूले राखेका थिए।

लगानीकर्ता तिलक कोइरालाले १५ दिनको सूचना अवधि घटाएर ७ दिनमा ल्याउनुपर्ने तथा ठूलो परिमाणमा सेयर खरिद–बिक्रीका लागि छुट्टै ‘बल्क’ कारोबारको व्यवस्था गर्नुपर्ने प्रस्ताव आफूले राखेको बताए। ‘अफर फर सेल’ र बल्क कारोबारका लागि छुट्टाछुट्टै व्यवस्था गर्न सकिने विषयमा समेत सुझाव दिएको उनले बताए।

आधारभूत सेयरधनीले ठूलो परिमाणमा सेयर बिक्री गर्नुपरेमा दोस्रो बजारमै ठूलो आपूर्ति सिर्जना गर्नुको सट्टा बल्क कारोबारका लागि छुट्टै विन्डो उपलब्ध गराउन सकिने र यसबाट ठूलो परिमाणको कारोबारलाई व्यवस्थित गर्न सकिने उनको भनाइ छ।

Ads

लगानीकर्ता एसपी चौलागाईंले आधारभूत सेयरधनीको विवरण सार्वजनिक हुने गरी छुट्टै पोर्टल बनाउनुपर्ने प्रस्ताव गरिएको बताए। उक्त पोर्टलमा प्रत्येक कम्पनीका आधारभूत सेयरधनीको नाम र उनीहरूसँग रहेको सेयर कित्ता नियमित रूपमा अद्यावधिक गर्ने व्यवस्था गर्नुपर्ने सुझाव दिइएको उनले बताए।

त्यस्तै, सेयर बिक्रीका लागि मात्र १५ दिने सूचना दिनुपर्ने तर खरिदका लागि त्यस्तो व्यवस्था नहुने अवस्था समान हुन नसक्ने भन्दै ठूलो परिमाणमा सेयर खरिद गर्न चाहने लगानीकर्ताका लागि पनि व्यवस्थित सूचना तथा कारोबारको व्यवस्था हुनुपर्ने विषय उठाइएको थियो।

चौलागाईंका अनुसार छलफलमा मार्जिन ट्रेडिङ, बुक क्लोजपछि मूल्य समायोजन तथा बोनस र हकप्रद सेयरसम्बन्धी केही अन्य विषयमा समेत लगानीकर्ताले धारणा राखेका थिए।

यो पनि पढ्नुहोस

सेयर बेच्नुअघि १५ दिने सूचना दिनुपर्ने व्यवस्थाबारे सेबोनसँग लगानीकर्ताको ३ घण्टा छलफल, कसले के भने? [भिडियोसहित]