नेपाल राष्ट्र बैंकले कर्णाली डेभलपमेन्ट बैंकलाई निक्षेप लिन र कर्जा दिन रोक लगाएको छ। नेपालगन्जस्थित यस बैंकमा गरिएको निरीक्षणमा पूँजीकोष अनुपात नपुग्ने, निष्क्रिय कर्जा अनुपात ४०.८५ प्रतिशत पुगेको, र अन्य वित्तीय समस्या देखिएपछि यस्तो कारबाही गरिएको हो।
राष्ट्र बैंकले वित्तीय अवस्था समस्याग्रस्त देखिएकाले निक्षेपकर्ता र सर्वसाधारणको हितमा सुधारात्मक कारबाही गर्दै थप निक्षेप संकलन, नयाँ खाता खोल्न, र कर्जा प्रवाह रोक्न निर्देशन दिएको छ।
यद्यपि, खराब वित्तीय सूचकका बीच पनि सेयर बजारमा यस बैंकको सेयर मूल्य उच्च रहेको छ। हाल प्रतिकित्ता मूल्य ८४० रुपैयाँ पुगेको छ, जुन सोमबार मात्रै ५.६६ प्रतिशतले बढेको थियो।
बैंकले सार्वजनिक गरेको चालु आर्थिक वर्षको पहिलो त्रैमासिक वित्तीय विवरणअनुसार तीन महिनामा १ करोड ९८ लाख रुपैयाँ खुद नोक्सानी भएको छ।
प्रतिकृया