सांग्रिला डेभलपमेन्ट बैंक लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गरेको छ। प्रकाशित विवरणअनुसार, बैंकको खुद नाफा ४६.६९ प्रतिशतले बढेर ८८ करोड ९९ लाख रुपैयाँ पुगेको छ। अघिल्लो आर्थिक वर्षको सोही अवधिमा बैंकले ६० करोड ६६ लाख रुपैयाँ खुद नाफा कमाएको थियो।
बैंकको इम्पेयरमेन्ट चार्ज उल्लेख्य रूपमा घट्नु, खुद ब्याज आम्दानी बढ्नु र सञ्चालन आम्दानीमा सुधार आउनु नाफा वृद्धिका मुख्य कारण बनेका छन्। इम्पेयरमेन्ट चार्ज ३४ करोड ५४ लाख रुपैयाँबाट घटेर ९ करोड १३ लाख रुपैयाँमा सीमित भएको छ, जसले खराब कर्जा व्यवस्थापन र कर्जा असुलीमा सुधार भएको संकेत गर्छ।
समीक्षा अवधिसम्म बैंकको खुद ब्याज आम्दानी १६.८३ प्रतिशतले बढेर २ अर्ब ४२ करोड रुपैयाँ पुगेको छ। यस्तै, सञ्चालन आम्दानी १९.९८ प्रतिशतले बढेर २ अर्ब ९५ करोड रुपैयाँ पुगेको छ। सञ्चालन नाफा पनि ५२.९८ प्रतिशतले बढेर १ अर्ब ३५ करोड रुपैयाँ पुगेको छ, जसले बैंकको मुख्य व्यवसायबाट आम्दानी गर्ने क्षमता बलियो बनेको देखाउँछ।
यद्यपि, बैंकको खराब कर्जा अनुपात ५.५२ प्रतिशतबाट बढेर ६.८७ प्रतिशत पुगेको छ। खराब कर्जा बढे पनि इम्पेयरमेन्ट चार्ज घटेकाले बैंकको नाफामा सकारात्मक प्रभाव परेको देखिन्छ।
समीक्षा अवधिमा बैंकले ५६ अर्ब ९२ करोड रुपैयाँ निक्षेप संकलन गरी ४५ अर्ब ८७ करोड रुपैयाँ कर्जा प्रवाह गरेको छ। बैंकको कर्जा–निक्षेप अनुपात (सीडी रेसियो) ८३.३७ प्रतिशत रहेको छ। साथै, बैंकको कस्ट अफ फन्ड्स ५.०१ प्रतिशतबाट घटेर ३.५४ प्रतिशत र आधार दर ७.०८ प्रतिशतबाट घटेर ५.५७ प्रतिशतमा झरेकाले बैंकको स्रोत लागत घटेको देखिन्छ।
बैंकको चुक्ता पूँजी ३ अर्ब ७३ करोड रुपैयाँ पुगेको छ। वितरणयोग्य नाफा ४९ करोड २३ लाख रुपैयाँ रहेको छ भने जगेडा कोषमा २ अर्ब १० करोड रुपैयाँ सञ्चित छ। प्रतिसेयर आम्दानी १७ रुपैयाँ ६ पैसाबाट बढेर २३ रुपैयाँ ८३ पैसा पुगेको छ। वितरणयोग्य प्रतिसेयर आम्दानी १३ रुपैयाँ १९ पैसा पुगेकाले लाभांश वितरण क्षमता पनि अघिल्लो वर्षको तुलनामा सुधार भएको देखिन्छ। यस्तै, प्रतिसेयर नेटवर्थ १६९ रुपैयाँ ५० पैसा पुगेको छ।
सामान्य बढ्यो मितेरी डेभलपमेन्ट बैंकको नाफा, ब्याज आम्दानीमा उल्लेख्य सुधार
प्रतिकृया