बजारको चिरफार Evening Walk – आज सेयरबजारमा केके भयो ?

कार्तिक १२ गते बिहिबार नेप्से परिसूचक ३१.५४ अंकले बढेर २,६९५.६० विन्दुमा बन्द भएको छ। आज सेयर बजारमा ८ अर्ब ५७ करोड ९ लाख ८८ हजार ८२३.३५ रुपैयाँ बराबरको कारोबार भएको छ।

कारोबार भएका कम्पनीमध्ये १८१ कम्पनीको सेयर मूल्य बढेको, ९१ कम्पनीको सेयर मूल्य घटेको र ६ कम्पनीको सेयर मूल्य स्थिर रहेको छ।

लक्ष्मी सनराइज बैंक लिमिटेडले गत आर्थिक वर्ष २०८२/८३ को नाफाबाट सेयरधनीलाई ५.२६ प्रतिशत लाभांश वितरण गर्ने प्रस्ताव गरेको छ।

बैंकको असोज २८ गते बसेको सञ्चालक समितिको ३३१औँ बैठकले हाल कायम चुक्ता पुँजीका आधारमा ५ प्रतिशत बोनस सेयर र कर प्रयोजनका लागि ०.२६ प्रतिशत नगद लाभांश वितरण गर्ने प्रस्ताव गरेको हो।

प्रस्तावअनुसार बैंकले १ करोड ३३ लाख ९० हजार ५८१.७३ कित्ता बोनस सेयर वितरण गर्नेछ। त्यस्तै, बोनस सेयरमा लाग्ने कर प्रयोजनका लागि ६ करोड ९६ लाख ३१ हजार २५ रुपैयाँ नगद लाभांश वितरण गर्ने प्रस्ताव गरिएको छ।

प्रस्तावित लाभांश नेपाल राष्ट्र बैंकको स्वीकृति र बैंकको आगामी वार्षिक साधारणसभाबाट पारित भएपछि वितरण हुनेछ।

ग्लोबल आइएमई बैंक लिमिटेडले संस्थापक सेयर सर्वसाधारण व्यक्ति तथा संस्थाले समेत खरिद गर्न पाउने गरी बिक्री खुला गरेको छ।

बैंकका केही संस्थापक सेयरधनीले आफ्नो नाममा रहेको सेयर बिक्री गर्न निवेदन दिएपछि सुरुमा विद्यमान संस्थापक सेयरधनीका लागि मात्रै बिक्री प्रक्रिया अघि बढाइएको थियो। तर, बैंकले तोकेको अवधिभित्र उक्त सेयर बिक्री हुन नसकेपछि अन्य व्यक्ति तथा संस्थाका लागि समेत बिक्री खुला गरिएको हो।

बैंकले बिक्रीमा राखिएको सेयरको संख्या र मूल्य भने खुलाएको छैन। सेयर खरिद गर्न इच्छुक व्यक्ति तथा संस्थाले आगामी ३५ दिनभित्र काठमाडौँको कमलादीस्थित बैंकको रजिष्टर्ड कार्यालयमा सम्पर्क गरी निवेदन दिन सक्नेछन्।