सुनचाँदी राख्न अब महँगो ‘धरौटी’ नचाहिने ! मन्जुश्री फाइनान्सले ल्यायो उच्च सुरक्षासहितको ‘फायरप्रूफ’ लकर सुविधा

मन्जुश्री फाईनान्स लिमिटेडले आफ्ना ग्राहकहरुलाई नयाँ सुविधा ‘मन्जुश्री सुपर सेफ लकर’ उपलब्ध गराएको छ। हाल यो सुविधा कर्पोरेट शाखा थापाथली र न्युरोडमा मात्र उपलब्ध छ। कम्पनीका अनुसार, ग्राहकहरुले यस लकर सुविधा उपयोग गर्दा कुनै पनि प्रकारको सेक्युरिटी डिपोजिट तिर्नुपर्ने छैन।

मन्जुश्री फाईनान्सले सिमित अवधिका लागि यो छुट उपलब्ध गराएको हो र ग्राहकहरुले यस अवसरको लाभ उठाउने अपेक्षा राखेको छ। लकर विभिन्न आकारमा उपलब्ध छन् र उच्च प्रविधि युक्त सुरक्षा प्रणाली, फायरप्रूफ र नियन्त्रित वातावरणमा राखिएका छन्। इच्छुक ग्राहकहरु आफ्नो खाता जुनसुकै शाखामा भए पनि आफूलाई सुविधाजनक शाखामा गएर यो सेवा लिन सक्नेछन्।

हालसम्म मन्जुश्री फाईनान्सले करिब २४ अर्ब रुपैयाँ निक्षेप संकलन गरेको छ भने २०.५ अर्ब रुपैयाँ कर्जा प्रवाह गरेको छ। कम्पनीसँग २८ वटा शाखा र एक विस्तारित काउन्टर रहेका छन्। यसले १ लाख ८५ हजार भन्दा बढी सन्तुष्ट ग्राहकलाई सेवा प्रदान गर्दै आएको छ।

यस अघि मन्जुश्री फाईनान्सले ग्राहकहरु माझ Manjushree Virtual Credit Card को सुविधा पनि उपलब्ध गराउँदै आएको थियो।