सहकारी लुटेरा र ठगहरू नै अहिले आफैंलाई निर्दोष देखाउँदै न्याय दिने भाषण गर्दैछन्: प्रधानमन्त्री ओली 

सहकारी काण्डको विषयमा गृहमन्त्री रवि लामिछानेमाथि चौतर्फी दबाब बढिरहेका बेला एमाले सचिवालय बैठक बस्दैछ। यसै सन्दर्भमा प्रधानमन्त्री एवं एमाले अध्यक्ष केपी शर्मा ओलीले आइतबार बागमती प्रदेशका वडाध्यक्षहरूको भेलामा सम्बोधन गर्दै गम्भीर आरोपहरू लगाए।

ओलीले सहकारी प्रकरणमा एमालेलाई गलत ढंगले प्रस्तुत गर्ने प्रयास भइरहेको बताए। उनले भने, “एमालेले सहकारीमा भ्रष्टाचार गरेको झैं भ्रम फैलाएर हामीविरुद्ध औंला ठड्याउने काम भइरहेको छ। सहकारी लुटेराहरू र ठगहरू नै अहिले आफैंलाई निर्दोष देखाउँदै न्याय दिने भाषण गरिरहेका छन्।”

Ads

Ads

Ads

उनले कडा भाषामा आलोचना गर्दै थपे, “उनीहरू आफैंले खाएर तिर्दैनन्, फिर्ता गर्दैनन्, अनि उल्टै भ्रष्टाचारविरुद्ध ठूला स्वरमा चिच्याउँछन्। यत्रो निर्लज्जता!”

ओलीको निशाना यत्तिमा मात्र सीमित भएन। उनले माओवादी केन्द्रका अध्यक्ष पुष्पकमल दाहाल ‘प्रचण्ड’प्रति पनि कटाक्ष गरे। “प्रचण्डको स्वर सुन्नुस् त, भ्रष्टाचारविरुद्ध बुरुकबुरुक गर्छन्। अहिले अवस्था यस्तो छ कि भ्रष्टहरूले नै भ्रष्टाचारविरुद्ध भाषण गरिरहेका छन्,” उनले व्यंग्य गरे।

प्रधानमन्त्री ओलीले माओवादीको मेची–महाकाली अभियानप्रति पनि टिप्पणी गर्दै भने, “एमालेले सुरु गरेको अभियानमा जनसागर उर्लिए पनि माओवादीको कार्यक्रममा त्यो देखिँदैन।”

२०६४ सालको संविधानसभा निर्वाचनको प्रसंग उठाउँदै ओलीले त्यतिबेला माओवादीले जनतामा लोकप्रिय भएर होइन, त्रास सिर्जना गरेर मत लिएको दाबी गरे। उनले भने, “त्यसबेला माओवादीले लडाकुहरूलाई क्याम्पमा राखेर, मान्छे तान्दै, कुट्दै, मार्दै, अंगभंग गराउँदै आतंक फैलाएका थिए। त्यो अवस्था माओवादीमय थिएन, आतंकराज थियो।”

अन्त्यमा ओलीले अहिलेको अवस्था २०६४ को जस्तो कहिल्यै नदोहोरिने दाबी गर्दै भने, “अब न २०६४ आउँछ, न माओवादी आउँछ।”