मंगलबार न्यूजील्याण्डमा गयो शक्तिशाली भूकम्प

न्यूजील्याण्डको दक्षिण टापुमा मंगलबार ६.७ म्याग्निच्युडको शक्तिशाली भूकम्प गएको छ। अधिकारीहरू विपद् व्यवस्थापन निकायमार्फत सुनामीको सम्भावना मूल्यांकन गरिरहेका छन्।

राष्ट्रिय आपतकालीन व्यवस्थापन विभागले साउथल्याण्ड र फियोर्डल्याण्ड क्षेत्रका बासिन्दालाई समुद्र तटबाट टाढा रहन आग्रह गरेको छ। चार हजार ७०० भन्दा बढीले भूकम्पको झट्का महसुस गरेका छन्, जबकि स्थानीय मिडियाले भवनहरू हल्लिएको र सामान खसेको जनाएको छ।

जियोनेटका अनुसार भूकम्प स्नेरेस टापुबाट १६० किलोमिटर उत्तर–पश्चिममा, ३३ किलोमिटर गहिराइमा केन्द्रित थियो। अमेरिकी भूगर्भ सर्वेक्षणले प्रारम्भिक रूपमा ७ म्याग्निच्युडको भूकम्प १० किलोमिटर गहिराइमा गएको जनाएको थियो।

अष्ट्रेलियाली मौसम विभागले मुख्य भूमि वा टापुहरूमा सुनामीको खतरा नरहेको बताएको छ। न्यूजील्याण्ड ‘रिङ अफ फायर’ मा पर्ने क्षेत्र हो, जुन ४०,००० किलोमिटर लामो ज्वालामुखी र समुद्री खाडलको श्रृंखला हो।

(एजेन्सीहरुको सहयोगमा)