रास्वपा–बालेनबीच एकता सहमति, प्रधानमन्त्रीको उम्मेदवार बालेन- सभापति रवि

राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौँ महानगरपालिकाका मेयर बालेन्द्र शाह (बालेन) बीच राजनीतिक एकता गर्ने सहमति भएको छ।

दुई पक्षबीच भएको सहमतिअनुसार एकतापछि पार्टीको नाम राष्ट्रिय स्वतन्त्र पार्टी नै रहनेछ भने सभापतिको जिम्मेवारी रवि लामिछानेले नै सम्हाल्नेछन्। आगामी प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवारका रूपमा बालेन्द्र शाह रहने समझदारी भएको छ।

Ads

सहमति पत्रअनुसार एकतापछि स्थापित हुने दलको झण्डा हालकै संरचनामा कायम रहनेछ। झण्डामा निलो पृष्ठभूमिको मध्यभागमा सेतो गोलाकार र त्यसको बीचमा निलो रङको घण्टीको आकृति रहनेछ। पार्टीको चुनाव चिह्न पनि ‘घण्टी’ नै रहने उल्लेख गरिएको छ।

‘पहिलो पक्ष र दोस्रो पक्षबीच बृहत् एकता भएपश्चात् स्थापित हुने राजनीतिक दलको नाम राष्ट्रिय स्वतन्त्र पार्टी, दलको झण्डा साविककै निलो पृष्ठभूमिको मध्य भागमा सेतो रङको गोलाकार बीचमा निलो रङको घण्टीको आकृति, दलको चुनाव चिह्न ‘घण्टी’ र केन्द्रीय कार्यालय काठमाडौँ उपत्यकामा रहने’, ‘सहमपति पत्रमा भनिएको छ, राष्ट्रिय स्वतन्त्र पार्टीको केन्द्रीय सभापति रवि लामिछाने रहने र आसन्न प्रतिनिधि सभाको निर्वाचनपछि संसदीय दलको नेता तथा भावी प्रधानमन्त्रीको उम्मेदवार बालेन्द्र शाह हुने।’