नेपाल सरकारले देशभरका २५ वटा अत्यावश्यक सेवामा हडताल गर्न कानुनी रूपमा निषेध गरेको छ। गृह मन्त्रालयको सिफारिसमा आवश्यक सेवा सञ्चालन ऐन, २०१४ को दफा ३ को उपदफा (१) अन्तर्गत प्राप्त अधिकार प्रयोग गरी जेठ २५ गते नेपाल राजपत्रमा सूचना प्रकाशित गरिएको हो।
सरकारले निषेध गरेका सेवाहरूमा डाक, तार, टेलिफोन, इन्टरनेट तथा अन्य सञ्चार सेवादेखि जल, स्थल र हवाई यातायात सेवासम्म पर्छन्। त्यस्तै अस्पताल, स्वास्थ्य केन्द्र, एम्बुलेन्स सेवा, औषधि उत्पादन तथा वितरण सेवा, खानेपानी, विद्युत र पेट्रोलियम पदार्थको ढुवानी तथा वितरण सेवामा पनि हडताल गर्न पाइने छैन। दैनिक जनजीवनसँग प्रत्यक्ष जोडिएका खाद्यान्न, दाल, चामल, नुन र तेलको पैठारी, ढुवानी तथा वितरण सेवा पनि यस सूचीमा समावेश छन्।
साथै बैंकिङ, बिमा, पर्यटन, होटेल तथा रेष्टुराँ सेवा, भेटेरिनरी सेवा, मौसम पूर्वानुमान सेवा, राहदानी विभाग र कन्सुलर सेवा पनि निषेधित सेवामा परेका छन्। हवाई अड्डा सञ्चालन, रक्षा सामग्री उत्पादन तथा वितरण, आन्तरिक सुरक्षा कार्य, फोहोरमैला व्यवस्थापन, सरकारी छापाखाना सेवा तथा मास्क र ह्याण्ड सेनिटाइजर सम्बन्धी सेवामा समेत हडताल गर्न नपाइने व्यवस्था गरिएको छ।
प्रतिकृया