नेपाल फिनटेक फेस्टिभल बिहिबार हुँदै, विश्वस्तरीय वक्ताहरूको सहभागितामा ऐतिहासिक सम्मेलनको तयारी

नेपालको फिनटेक क्षेत्रलाई नयाँ उचाइमा पुर्‍याउने लक्ष्यसहित “नेपाल फिनटेक फेस्टिभल २०२५” आउँदो वैशाख २५ गते बिहिबार काठमाडौंमा आयोजना हुने भएको छ। काठमाडौं फिनटेक र फिनटेक अलायन्स नेपालको सहकार्यमा हुन लागेको यो कार्यक्रमलाई युनियनपेको शीर्ष प्रायोजन र नेपाल क्लियरिङ हाउसको प्रमुख साझेदारीमा सम्पन्न हुदैछ।

नेपालमा पहिलोपटक यस किसिमको बृहत फिनटेक सम्मेलन आयोजना हुन लागेको हो, जसमा डिजिटल बैंकिङ, डिजिटल भुक्तानी प्रणाली, र नवप्रवर्तनमा आधारित वित्तीय सेवा विकासबारे छलफल गरिनेछ।

Ads

Ads

Ads

कार्यक्रममा बैंक, बीमा, फिनटेक, इन्टरनेट सेवा प्रदायक, नियामक निकाय, लगानीकर्ता, प्रविधि क्षेत्र, शिक्षा क्षेत्र र सरकारी निकायका प्रतिनिधिहरू सहभागी हुनेछन्। सहभागीहरूमा कम्पनीका सञ्चालक, प्रमुख कार्यकारी अधिकृत, प्रविधि विभाग प्रमुख, डाटा विज्ञ र प्रविधि विकासमा संलग्न सरोकारवालाहरू रहनेछन्।

सम्मेलनमा २०० भन्दा बढी निर्णयकारी तहमा रहेका व्यक्तिहरूबीच नेटवर्किङ र अनुभव साटासाटको अवसर हुने आयोजकले जनाएको छ। साथै, सहभागीहरूले नवीनतम प्रविधि तथा सेवाहरूको प्रदर्शनी अवलोकन गर्न सक्नेछन्।

कार्यक्रमलाई ग्लोबल फिनटेक अलायन्स, एसिया फिनटेक अलायन्स, फिनटेक कन्भर्जेन्स काउन्सिल, इन्टरनेसनल डिजिटल इकोनोमिज एसोसिएसन, इन्डियन फाइनान्सियल फोरम र पीएसपी एसोसिएसन नेपाल लगायतका प्रतिष्ठित संस्थाहरूले समर्थन गरेका छन्।

सम्मेलनमा डीबीएस बैंकका पूर्व प्रमुख नवप्रवर्तन अधिकृत नील क्रस, कोटाक महिन्द्रा बैंकका पूर्व डिजिटल प्रमुख दीपक शर्मा, द डिजिटल फिफ्थका सीईओ समीर सिंह जैनी र लाइरा नेटवर्कका सीईओ राजेश देसाई लगायतका चर्चित अन्तर्राष्ट्रिय वक्ताहरूले सम्बोधन गर्नेछन्।

त्यस्तै, आदिस्वानका सहसंस्थापक तथा सीईओ अनिमेश चौहान, केयरएज एनालिटिक्सका एसोसिएट डाइरेक्टर निनाद भाटे, सिसाका ग्लोबल सेल्स उपाध्यक्ष अशोक कविचन्द्रन र क्यासका कार्यकारी उपाध्यक्ष कोमल छेडाले समेत आफ्ना विचार प्रस्तुत गर्नेछन्।

सम्मेलनमा नेपाल राष्ट्र बैंकका निवर्तमान गभर्नर महाप्रसाद अधिकारी पनि विशेष अतिथिका रूपमा सहभागी हुनेछन्। साथै, नेपाली फिनटेक क्षेत्रका अनुभवी व्यक्तित्वहरू नेपाल क्लियरिङ हाउसका सीओओ मुनाराज भण्डारी, सिटीटेक ग्रुपका सीईओ साजन शर्मा, स्मार्ट च्वाइस टेक्नोलोजिजका सीईओ मनोज घिमिरे, आइएमई पेका सीईओ तथा पीएसपी एसोसिएसनका अध्यक्ष प्रवीण रेग्मी, फिनटेक अलायन्स नेपालका उपाध्यक्ष तथा खल्तीका सहसंस्थापक अमित अग्रवाल, फोनपेका सीओओ पारस कुँवर र ईसेवाका प्रमुख रणनीति अधिकृत रबी शाक्यले आफ्ना अनुभवहरू प्रस्तुत गर्नेछन्।

कार्यक्रममा फोनेपे, डेटा वर्ल्ड, स्मार्ट च्वाइस टेक्नोलोजिज, आइएमई पे, सिसा, जिग्राम, आदिस्वान र सिल्भर लाइनिङ प्रा.लि. लगायतका कम्पनीहरूले आफ्ना नवीनतम प्रविधिहरू प्रदर्शनीमार्फत प्रस्तुत गर्नेछन्।