समानुपातिक बाँडफाँडमा बालेन–रवि समझदारी : ४० बालेन पक्ष, ७० रास्वपा

राष्ट्रिय स्वतन्त्र पार्टी (रास्वपा) को समानुपातिक सांसद उम्मेदवार सूचीमा काठमाडौं महानगरपालिकाका मेयर बालेन्द्र शाह (बालेन) पक्षबाट ४० जनाको नाम समावेश हुने भएको छ। यसबारे रास्वपा सभापति रवि लामिछाने र बालेनबीच आइतबार बिहान सहमति भएको छ।

निर्वाचन आयोगले आज र भोलि समानुपातिक निर्वाचन प्रणालीतर्फका उम्मेदवारहरूको बन्द सूची बुझाउने कार्यतालिका तय गरेको छ। समानुपातिकतर्फ कुल ११० जनाको नाम बुझाउनुपर्ने व्यवस्था छ। सोहीअनुसार बालेन पक्षबाट ४० र बाँकी ७० जना रास्वपाबाट उम्मेदवार रहने गरी सूची तयार गर्ने समझदारी भएको बताइएको छ।

यद्यपि आइतबार बिहान रास्वपा र बालेनबीच भएको ७ बुँदे लिखित सम्झौतामा समानुपातिक उम्मेदवारको बाँडफाँडबारे उल्लेख छैन। तर यस विषयमा मौखिक समझदारी भएको हो।