प्रधानमन्त्री ओलीले भने, “हामी अपराधीलाई बचाउने र निर्दोषलाई फसाउने काम कहिल्यै गर्दैनौँ”

प्रधानमन्त्री केपी शर्मा ओलीले प्रहरीको काममा सरकार कुनै हस्तक्षेप नगर्ने स्पष्ट पारेका छन्। काठमाडौंको जिल्ला प्रहरी परिसरको भवन उद्घाटन कार्यक्रममा बोल्दै उनले वर्तमान सरकारले अपराधीलाई संरक्षण गर्ने आदेश नदिने र निर्दोषलाई फसाउने काम नगर्ने बताए।

ओलीले प्रहरीलाई काम गर्न पूर्ण स्वतन्त्रता भए पनि नाकाम गर्ने छुट नरहेको र यसलाई मूल्यांकन गरिने चेतावनी दिए।

Ads

उनले पुरानो शैलीले अपराध नियन्त्रण गर्न नसक्ने बताउँदै, अपराध हुनै नदिनु पहिलो प्राथमिकता हुनुपर्नेमा जोड दिए। घुमुवा प्रहरीको पुरानो शैलीबाट उपलब्धि हासिल नहुने भन्दै, स्रोत र साधनले सम्पन्न अनुसन्धान प्रणालीलाई नयाँ तरिकाले विकास गर्नुपर्ने आवश्यकता औंल्याए।

अपराध रोकथामका लागि पूर्व जानकारी र नियन्त्रणलाई महत्त्वपूर्ण ठहर गर्दै, प्रहरीले अपराधको सुरुवातमै थाहा पाई नियन्त्रण गर्नसक्ने विश्वास जनमानसमा पैदा होस् भन्ने चाहना व्यक्त गरे।