पक्राउ परेका नेकपाका उम्मेदवार चौधरी सहित ४ जनामाथि अनुसन्धान सुरु

Ads

पर्सा क्षेत्र नम्बर २ बाट प्रतिनिधिसभा सदस्यका उम्मेदवार मनोज चौधरी बमसहित पक्राउ परेका छन्। चौधरी नेपाली कम्युनिस्ट पार्टी (नेकपा)सँग सम्बन्धित छन् र उनलाई पर्सागढी नगरपालिका बढनिहारबाट नियन्त्रणमा लिइएको जिल्ला प्रहरी कार्यालय पर्साले जनाएको छ।

प्रहरीले जानकारी दिएको अनुसार, चौधरी बा १० च १२५० नम्बरको गाडीमा सवार थिए र शंकास्पद वस्तु देखिएपछि गरिएको जाँचमा गाडीमा ‘होक्सी बम’ फेला परेको थियो। फेला परेको बम नेपाली सेनाको टोलीमार्फत डिस्पोज गरिएको छ।

Ads

चौधरीसँगै सहाव आलम अन्सारी (२६, बारा), सुरज कार्की (३०, धनुषा) र सत्यनारायण थारु (६८, पर्सा) पनि पक्राउ परेका छन्। उनीहरूमाथि विस्फोटक पदार्थसम्बन्धी कसुर, सार्वजनिक शान्तिविरुद्धको कसुर, र निर्वाचनसम्बन्धी कसुरमा अनुसन्धान भइरहेको छ।

चौधरीमाथि निर्वाचन ऐन २०७३ र मुलुकी फौजदारी संहिताअन्तर्गत मुद्दा दर्ता गरी अनुसन्धान प्रक्रिया अघि बढाइएको छ भने उनी सवार गाडी पनि प्रहरीले नियन्त्रणमा लिएको छ।