भारतीय रिजर्भ बैंक (आरबिआई) ले भारतीय नवीकरणीय ऊर्जा विकास एजेन्सी (इरेडा) द्वारा प्रस्तावित माथिल्लो कर्णाली जलविद्युत् परियोजनामा ५ प्रतिशत सेयर लगानी र ६२ अर्ब रुपैयाँ ऋण उपलब्ध गराउने प्रस्ताव अस्वीकृत गरेको छ।
आरबिआईको निर्णयपछि इरेडाले पुनः आवेदन दिने तयारी गरिरहेको छ। भारतीय सञ्चारमाध्यमका अनुसार फागुन २३ गते आरबिआईले इरेडालाई पत्राचारमार्फत निर्णयको जानकारी गराएको थियो। इरेडाले भारतको नेशनल स्टक एक्सचेन्ज (NSE) र बम्बई स्टक एक्सचेन्ज (BSE) लाई पनि औपचारिक जानकारी गराइसकेको छ।
यस अस्वीकृतिले इरेडाको सेयर मूल्यमा असर पारेको छ। सोमबार, यसको मूल्य १.६ प्रतिशत घटेर १४७.२ भारुमा झरेको थियो, जुन पछि थप घट्दै १४२.०५ भारुमा पुगेको भारतीय सञ्चारमाध्यमले जनाएको छ।
इरेडाले २०२४ जुलाई १६ मा आफ्नो सञ्चालक बोर्डबाट नेपालस्थित जीएमआर माथिल्लो कर्णाली हाइड्रो पावर लिमिटेड र कर्णाली ट्रान्समिसन कम्पनी प्रालिमा १० प्रतिशत सेयर लगानी गर्ने सैद्धान्तिक स्वीकृति प्राप्त गरेको थियो। सतलज जलविद्युत् निगम (SJVN) सँगको साझेदारीमा कुल लगानी करिब २९० करोड भारतीय रुपैयाँ अनुमान गरिएको थियो।
तर, आरबिआईको अस्वीकृतिले परियोजनाको वित्तीय व्यवस्थापनमा अन्योल थपिएको छ।
नेपाल सरकारले भने लगानी स्वीकृत गर्ने प्रक्रिया अन्तिम चरणमा पुर्याइसकेको छ। जीएमआर समूहले नेपाल विद्युत् प्राधिकरणलाई २७ प्रतिशत निःशुल्क सेयर दिने सम्झौता गरिसकेको छ। बाँकी ७३ प्रतिशत सेयरमध्ये ३४ प्रतिशत जीएमआर, ३४ प्रतिशत सतलज जलविद्युत् निगम (SJVN) र ५ प्रतिशत इरेडाले राख्ने सहमति भएको थियो।
भारत सरकारको लगानी विभागले २०२४ जनवरी २५ मा स्वपुँजी लगानीको स्वीकृति प्रदान गरिसकेको थियो। तथापि, आरबिआईको अस्वीकृतिले परियोजनाको वित्तीय व्यवस्थापनमा ढिलाइ गर्ने संकेत देखिएको छ। इरेडाले पुनः आवेदन दिने तयारी गरिरहेकोले आगामी महिनामा परियोजनाको लगानी प्रक्रियाबारे थप स्पष्टता आउने अपेक्षा गरिएको छ।
प्रतिकृया