२० वर्षमा विहे गर्नू, ३० वर्षभित्र तीन सन्तान जन्माउनू: प्रधानमन्त्री ओली

प्रधानमन्त्री केपी शर्मा ओलीले विकास र समृद्धिसँगसँगै जनसङ्ख्याको समानुपातिक वृद्धि नहुँदा मानव अस्तित्व नै संकटमा पर्ने चेतावनी दिएका छन्। विश्व जनसङ्ख्या दिवसको अवसरमा स्वास्थ्य तथा जनसङ्ख्या मन्त्रालयले आयोजना गरेको कार्यक्रममा बोल्दै उनले समयमा विवाह गरी सन्तान उत्पादनमा लाग्न आग्रह गरे।

प्रधानमन्त्री ओलीले विकास र जनसङ्ख्याको गति सँगै हुनु आवश्यक रहेको उल्लेख गर्दै हरेक व्यक्तिले सन्तानको जन्मलाई पृथ्वीप्रति जिम्मेवारीका रूपमा लिनुपर्ने बताए। उनले मानव अस्तित्व जोगाउन उपयुक्त नीति र कदमहरू चाल्नुपर्नेमा जोड दिंदै, विनाशकारी हतियार बनाउँदै मान्छे मार्ने प्रवृत्तिको विरोध गरे।

Ads

उनले जनसङ्ख्यामा असन्तुलन आउन नदिन आग्रह गर्दै, सरकारले २० वर्षपछि मात्रै विवाह गर्न दिने कानुनी व्यवस्था गरेको स्मरण गराए। साथै, “३० वर्षभित्र तीन सन्तान पाइसकौं र ४० कटेपछि रमाउला” भन्ने गीत जस्तो व्यवहार गर्न आग्रह गर्दै गीत–सन्देशले सन्तानवृत्तिमा नकारात्मक प्रभाव पारेकोमा चिन्ता व्यक्त गरे।

प्रधानमन्त्री ओलीले विकासशील मात्र होइन, विकसित देशहरूमा समेत जनसङ्ख्या ऋणात्मक हुँदा मानव अस्तित्व संकटमा परेको उदाहरण दिँदै, जनसङ्ख्याको सन्तुलन र व्यवस्थापनका लागि नयाँ जनसङ्ख्या नीति कार्यान्वयनमा जोड दिए।