वर्षमान पुन भन्छन्, “माओवादीले गर्दा जनता देशको मालिक भएका छन्”

नेकपा माओवादी केन्द्रका उपमहासचिव तथा पूर्व अर्थमन्त्री वर्षमान पुनले माओवादीको सपनाका कारण जनतालाई देशको मालिक बनाउने अवस्था सृजना भएको बताएका छन्।

उनले विगतमा धर्मका नाममा शासनसत्ता चलाउने र हिन्दु धर्म अनुसार राजालाई विष्णुको अवतार मान्दै देशको मालिकका रूपमा स्वीकार गर्ने पुरानो परम्परा गणतन्त्रले तोड्न सफल भएको उल्लेख गरे।

Ads

रोल्पाको लुङ्ग्री गाउँपालिका–५ मा नवनिर्मित भवन उद्घाटन गर्दै पुनले जनयुद्ध र जनआन्दोलनको परिणामस्वरूप देशमा गणतन्त्र स्थापना भई जनता नै मालिक भएको धारणा स्थापित भए पनि जनताको सबै माग पूरा हुन नसकेको स्वीकार गरे।

उनले माओवादीले अघि सारेको ‘गाउँ–गाउँमा सिंहदरबार’ नारालाई स्मरण गर्दै संघीयताले आफैंले आफैंलाई शासन गर्ने अवस्था निर्माण गरेको बताए। तर जनताको जीवनस्तर अझै सुधार हुन नसकेको र त्यसका लागि थप मेहनत आवश्यक रहेको औंल्याए।

पुनले गणतन्त्रले विकासलाई तीव्रता दिएको उदाहरण प्रस्तुत गर्दै भने कि पञ्चायतकालभर जम्मा ७ हजार किलोमिटर सडक निर्माण भयो, बहुदलीय व्यवस्थामा यो संख्या १८ हजार किलोमिटर पुग्यो, तर गणतन्त्रका १५ वर्षमा एक लाख किलोमिटरभन्दा बढी सडक निर्माण भएको छ। यसले देखाउँछ कि गणतन्त्र जनताको हितका लागि सही व्यवस्था हो। तथापि, जनताको अपेक्षा र वास्तविकताबीचको दूरी हटाउन गणतन्त्रलाई अझ सुधार गर्नुपर्ने आवश्यकता रहेको उनले बताए।