नेपाल राष्ट्र बैंकका गभर्नर महाप्रसाद अधिकारीले आफ्नो कार्यकाल समाप्ति हुन केही महिना मात्र बाँकी रहेको अवस्थामा २६ जना निर्देशकको सरुवा गरेका छन्। पुष २२ गतेको निर्णयअनुसार २४ जनालाई नियमित सरुवा र दुई जनालाई पदस्थापन गरिएको छ। यस सरुवा प्रक्रिया पौष २८ देखि लागू हुनेछ र यसले बैंकको विभिन्न विभागमा नयाँ नेतृत्व र दक्षता ल्याउने अपेक्षा गरिएको छ। लामो समयदेखि महत्त्वपूर्ण विभागमा कार्यरत निर्देशकहरूलाई नयाँ विभागमा सरुवा गरिएको छ भने महत्त्वपूर्ण विभागमा नयाँ निर्देशकहरूको नियुक्ति गरिएको छ।
नियमन विभागमा रहेका डा. सत्येन्द्र तिमिल्सिनालाई गभर्नरको कार्यालयमा तानिएको छ र उनका स्थानमा नेपालगन्ज कार्यालयका देवेन्द्र गौतमलाई नियमन विभागमा ल्याइएको छ। वित्त व्यवस्थापन विभागबाट इन्द्रा चाम्लागाइँ मैनालीलाई नियमन विभागमा सरुवा गरिएको छ भने, मीना पाण्डेलाई बैंक सुपरिवेक्षण विभागमा पठाइएको छ।
लघुवित्त संस्था सुपरिवेक्षण विभागमा सिद्धार्थनगर कार्यालयका विज्ञान राज सुवेदीलाई सरुवा गरिएको छ र वीरगञ्ज कार्यालयका शरण कुमार अधिकारीलाई गैर-बैंक वित्तीय संस्था सुपरिवेक्षण विभागमा तानिएको छ। पोखरा कार्यालयकी विना ढकाल पौडेललाई विदेशी विनिमय व्यवस्थापन विभागमा र धनगढी कार्यालयका सुवास आचार्यलाई बैंक सुपरिवेक्षण विभागमा सरुवा गरिएको छ।
प्रतिकृया