अध्यक्ष ढकालले भने, “नेपालमा लगानीको वातारण बनेको छ, ढुक्कसँग लगानी गर्नुस्”

नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानीको वातावरण सुधार भइरहेको भन्दै लगानीकर्तालाई नेपालमा लगानी गर्न आग्रह गरेका छन्। मंगलबार थाइल्याण्डको बैंककमा आयोजित व्यवसाय र मानव अधिकारसम्बन्धी छलफल कार्यक्रममा बोल्दै उनले नेपालले हालै आठवटा लगानीसम्बन्धी कानुन परिमार्जन गरेको र द्विपक्षीय लगानी सम्झौता ढाँचा अनुमोदन भएको जानकारी गराए।

ढकालले स्वदेशी र विदेशी लगानी बढ्दा रोजगारीका अवसरहरू सिर्जना हुने र श्रमिक सुरक्षा प्रत्याभूति हुने बताए। साथै, उत्पादन र उत्पादकत्वमा वृद्धि हुँदा लगानीकर्ता र श्रमिकको हक सुरक्षाको वातावरण निर्माण हुने उनको भनाइ थियो। साना तथा मझौला उद्यमीको अधिकार सुनिश्चित नगरी समग्र क्षेत्रमा प्रगति सम्भव नभएको भन्दै उनले साना उद्यमीको हकमा सरकार र विकास साझेदारले ध्यान दिनुपर्नेमा जोड दिए।

अनौपचारिक क्षेत्र र त्यहाँ कार्यरत श्रमिकको औपचारिकीकरणको आवश्यकता रहेको बताउँदै अध्यक्ष ढकालले यसका लागि रणनीति बनिरहेको र सबै क्षेत्र मिलेर काम गर्नुपर्ने बताए। साथै, उनले महासंघ मानव अधिकारप्रति संवेदनशील रहेको र जिम्मेवार व्यवसायिक अभ्यासलाई प्रोत्साहित गरेर लगानी आकर्षित गर्ने लक्ष्यमा रहेको बताए।