सम्पत्ति शुद्धीकरण अनुसन्धान विभागले शीर्ष नेताहरूको सम्पत्तिमा अनुसन्धान तीव्र बनाएको छ। यस क्रममा विभागले नेपाल राष्ट्र बैंक, कम्पनी रजिस्ट्रार, सिडिएस एन्ड क्लियरिङ लिमिटेड र भूमिसुधार तथा मालपोत विभागमा पत्राचार गरी विवरण पठाउन भनेको छ।
विभागले पूर्वप्रधानमन्त्री तथा कांग्रेस सभापति शेरबहादुर देउवा, उनकी पत्नी तथा निवर्तमान परराष्ट्रमन्त्री आरजु राणा देउवा र पुत्र जयवीर देउवाका बैंक खाता, सेयर कारोबार र जग्गाका विवरण मागेको छ। यस्तै पूर्वप्रधानमन्त्रीसमेत रहेका एमाले अध्यक्ष केपी ओली, माओवादी अध्यक्ष पुष्पकमल दाहाल ‘प्रचण्ड’ र कांग्रेस नेता दीपक खड्काका विवरण पनि मागिएको छ।
राष्ट्र बैंकमार्फत खातामा मौज्दात र वित्तीय कारोबार पठाउन पत्राचार गरिएको छ भने कम्पनी रजिस्ट्रार, सिडिएस र मालपोतमार्फत कम्पनी, धितोपत्र र घरजग्गाका विवरण मागिएको छ। शीर्ष नेताका घरमा भेटिएका पैसामा फरेन्सिक परीक्षण भइरहेको छ। विभागका अनुसार प्रारम्भिक अनुसन्धान जारी छ र छुट्टै टोलीमार्फत काम भइरहेको छ।
प्रतिकृया