जेलमा भेट्न गएका भट्टराईलाई रविले भने, “ममाथि राजनीतिक प्रतिशोध भएको छ यो सन्देश बाहिर लैजानु”

नेपाल समाजवादी पार्टीका अध्यक्ष डा. बाबुराम भट्टराईले जिल्ला प्रहरी कार्यालय कास्कीको हिरासतमा रहेका रास्वपा सभापति रवि लामिछानेसँग भेट गरेका छन्।

भेटपछि भट्टराईले लामिछानेमाथि राज्यबाट एकपछि अर्को अन्यायपूर्ण र प्रतिशोधपूर्ण व्यवहार भइरहेको टिप्पणी गरे। उनले लामिछानेलाई सशक्त राजनीतिक नेतृत्वको प्रतीकका रूपमा लिने र राज्यका अस्वभाविक गतिविधिहरूप्रति ऐक्यबद्धता जनाए।

Ads

Ads

Ads

भट्टराईले सहकारी समस्याको गम्भीरता पनि औंल्याए, जसले ५० लाखभन्दा बढी साना बचतकर्ताहरूलाई प्रभावित बनाएको छ। उनले सत्तामा बसेका नेताहरूको अपचलनले समस्यालाई झन जटिल बनाएको भन्दै कानुनी मार्गदर्शन अनुरूप समाधानको माग गरे।

यस्तै, उनले राजनीतिक प्रतिशोध र सहकारी समस्याको समाधान नहुनु देशका लागि खतरनाक रहेको बताए, जसले अन्ततः देशलाई बर्बादीतर्फ लैजान सक्छ। भेटका क्रममा लामिछानेले आफूमाथि राजनीतिक प्रतिशोध भएको र यो सन्देश बाहिर लैजान आग्रह गरेको भट्टराईले बताएका छन्।