बजारको चिरफार Evening Walk – बुधबार, २१ असोज २०८३ (७ अक्टोबर २०२६)

असोज २१ गते  बुधबार नेप्से परिसूचक ६.३८ अंकले घटेर २,५७२.३४ विन्दुमा बन्द भएको छ। आज सेयर बजारमा ३ अर्ब ७४ करोड ८० लाख ८ हजार ३०३ रुपैयाँ ८ पैसा बराबरको कारोबार भएको छ।

कारोबार भएका कम्पनीमध्ये ९९ कम्पनीको सेयर मूल्य बढेको, १६७ कम्पनीको सेयर मूल्य घटेको र १३ कम्पनीको सेयर मूल्य स्थिर रहेको छ।

गुहेश्वरी मर्चेन्ट बैंकिङ एण्ड फाइनान्स लिमिटेडले १६ करोड ८४ लाख ९० हजार रुपैयाँमा जग्गा खरिद गरेको छ।

वित्तीय संस्थाले ललितपुर उपमहानगरपालिका–३ स्थित सिट नम्बर ३घ, कित्ता नम्बर १४० को १२ आना जग्गा खरिद गरेको हो। कम्पनीले उक्त जग्गा आफ्नो स्वःप्रयोजनका लागि खरिद गरेको जनाएको छ।

लुम्बिनी विकास बैंक र प्रभु महालक्ष्मी लाइफ इन्स्योरेन्सले संस्थापक समूहको सेयर बिक्रीमा ल्याएका छन्। दुवै कम्पनीले विद्यमान संस्थापक सेयरधनीलाई प्राथमिकता दिँदै सेयर खरिदका लागि आवेदन माग गरेका छन्।

लुम्बिनी विकास बैंकले संस्थापक समूहको १ लाख ५१ हजार ५८५ कित्ता सेयर बिक्रीमा राखेको छ। यसअघि विद्यमान संस्थापक सेयरधनीलाई ३५ दिनको समय दिइएको भए पनि उक्त अवधिमा सेयर खरिदका लागि आवेदन नपरेपछि सर्वसाधारण लगानीकर्ता तथा संस्थाका लागि सेयर बिक्री खुला गरिएको हो। बैंकको सेयर खरिद गर्न इच्छुक लगानीकर्ता तथा संस्थाले १५ दिनभित्र काठमाडौंको डिल्लीबजारस्थित बैंकको केन्द्रीय कार्यालयमा आवेदन दिन सक्नेछन्।

त्यस्तै, प्रभु महालक्ष्मी लाइफ इन्स्योरेन्सले संस्थापक सेयरधनी नवराज अधिकारीको नाममा रहेको १३ हजार कित्ता संस्थापक सेयर बिक्रीमा ल्याएको छ। अधिकारीले आफ्नो नाममा रहेको सेयर बिक्री गर्न कम्पनीमा निवेदन दिएपछि कम्पनीले बिक्री प्रक्रिया अघि बढाएको हो। संस्थापक सेयरमा पहिलो प्राथमिकता विद्यमान संस्थापक सेयरधनीलाई दिनुपर्ने भएकाले हाल उक्त सेयर उनीहरूले मात्रै खरिद गर्न सक्नेछन्। इच्छुक संस्थापक सेयरधनीले सूचना प्रकाशित भएको मितिले ३५ दिनभित्र काठमाडौंको कमलादीस्थित कम्पनीको केन्द्रीय कार्यालयमा आवेदन दिनुपर्नेछ। तोकिएको अवधिभित्र विद्यमान संस्थापक सेयरधनीबाट आवेदन नपरेमा उक्त सेयर सर्वसाधारणका लागि बिक्री खुला गरिने कम्पनीले जनाएको छ।

बेनी हाइड्रोपावर प्रोजेक्ट कम्पनी लिमिटेडले आफ्नो सेयर रजिष्ट्रारमा प्रभु क्यापिटल लिमिटेडलाई नियुक्त गरेको छ। कम्पनीको सञ्चालक समितिको निर्णयअनुसार प्रभु क्यापिटललाई सेयर रजिष्ट्रार नियुक्त गरिएको हो।

अब बेनी हाइड्रोपावरको सम्पूर्ण धितोपत्रसम्बन्धी अभिलेख राख्ने, सेयर अभौतिकीकरण गर्ने, नामसारीलगायतका कार्य प्रभु क्यापिटलमार्फत हुनेछन्।