भोलिदेखि ३ दिन काठमाडौंका यी स्थानमा बिजुली काटिने

नेपाल विद्युत प्राधिकरणले प्रसारण लाइन स्तरोन्नति कार्यका लागि काठमाडौंका विभिन्न क्षेत्रमा तीन दिन विद्युत् आपूर्ति अवरुद्ध हुने जनाएको छ।

प्राधिकरणअन्तर्गत आयोजना व्यवस्थापन निर्देशनालयले सञ्चालन गरिरहेको १३२ केभी प्रसारण कन्डक्टर अपग्रेडिङ आयोजना अन्तर्गत स्पूचाटार सबस्टेशनदेखि मातातीर्थ सबस्टेशनसम्मको १३२ केभी प्रसारण लाइनमा पुरानो तार प्रतिस्थापन गर्न लागिएको हो।

Ads

Ads

Ads

यस कार्यका लागि जेठ २९ गते शुक्रबार, ३० गते शनिबार र ३१ गते आइतबार बिहान ९ः३० बजेदेखि दिउँसो १ बजेसम्म कुलेश्वर वितरण केन्द्रअन्तर्गतका थानकोट र सतुंगल फिडरमार्फत विद्युत् आपूर्ति हुने क्षेत्रहरूमा विद्युत् सेवा बन्द गरिने प्राधिकरणले जनाएको छ।

थानकोट फिडरअन्तर्गत चन्द्रागिरी नगरपालिका–१४ कार्यालय आसपास, बालकुमारी मन्दिर, सशस्त्र प्रहरी बल कार्यालय, सीजी क्षेत्र, पुरानो नैकाप, बलम्बु, चुनदेवी, खहरे, दहचोक, ढुङ्गेधारा, ब्राइट फ्युचर, बाइछाप, यातायात, दाउरा डिपो, हाईभिजन कोलोनी, पशुविकास तथा श्रृजना चोक आसपासका क्षेत्रमा विद्युत् आपूर्ति प्रभावित हुनेछ।

त्यस्तै सतुंगल फिडरअन्तर्गत धौलागिरी गेट आसपास, सिँचाफाँट तथा शिवमन्दिर आसपासका क्षेत्रमा पनि सो अवधिभर विद्युत् सेवा अवरुद्ध हुने प्राधिकरणले जनाएको छ।

Ads

प्राधिकरणले मौसम प्रतिकूल भएमा निर्धारित समय परिवर्तन हुन सक्ने जनाएको छ। साथै, निर्धारित समयमै कार्य सम्पन्न गर्ने प्रयास गरिने उल्लेख गर्दै यसबाट ग्राहक वर्गमा पर्न जाने असुविधाप्रति क्षमायाचना गरेको छ।