मैले भ्रष्टाचार गरेको पाइएमा यहाँ मात्र होइन म चित्रगुप्तसमक्ष पनि बयान दिन तयार छु: प्रधानमन्त्री ओली

प्रधानमन्त्री केपी शर्मा ओलीले भ्रष्टाचार गर्ने कसैलाई पनि कानुन अनुसार कारबाही गर्न सरकार दृढ रहेको र कसैको अनुहार हेरेर नरम वा कडा व्यवहार नगर्ने स्पष्ट गरेका छन्।

प्रतिनिधि सभाको राज्य व्यवस्था तथा सुशासन समितिको मङ्गलबारको बैठकमा भ्रष्टाचार निवारण, ऐन २०५९ को संशोधन विधेयकको औचित्य स्पष्ट गर्दै प्रधानमन्त्री ओलीले आफ्नो शून्य सहनशीलता नीति दोहोर्‍याए। उनले भने, “संविधानले विकास र समृद्धिका लागि सुशासन कायम गर्नुपर्ने प्रबन्ध गरेको छ। भ्रष्टाचार तगारोका रूपमा रहेको छ, त्यसैले भ्रष्टाचारको नियन्त्रण अनिवार्य छ।” उनले यसै बीचमा स्पष्ट गरे, “मैले भ्रष्टाचार गरेको पाइएमा म यस धर्तीमा मात्र होइन, चित्रगुप्तसमक्ष पनि बयान दिन तयार छु।”

Ads

प्रधानमन्त्री ओलीले यो सरकारको गठन आर्थिक विकासको लक्ष्यका साथ भएको र यसले कुनै प्रतिशोधका लागि काम नगर्ने पनि स्पष्ट गरे। उनले भने, “समृद्धिको बाटो अघि बढाउन सरकार क्रियाशील छ, र कानुनको दृष्टिमा सबै बराबर हुनु पर्छ।”

अख्तियार दुरुपयोग अनुसन्धान आयोगमा राजनीतिक भागबन्डा नगर्ने सम्बन्धमा सांसदहरूको सुझावको जवाफ दिँदै, प्रधानमन्त्री ओलीले आयोगका प्रमुखहरूको नियुक्ति संसदीय सुनुवाइ प्रक्रियाबाट भएको र यसलाई भागबन्डा भन्न नमिल्ने बताए। उनले सांसदहरूलाई नियुक्तिहरूको सिफारिस गर्दा आत्मसमीक्षा गर्न आग्रह गरे।

प्रधानमन्त्री ओलीले ललितपुर महानगरको स्थापना दिवसको अवसरमा आयोजित कार्यक्रममा देशलाई भ्रष्टाचारमुक्त बनाउन सरकार कार्यरत रहेको उल्लेख गर्दै भने, “देशलाई सच्चाएर अघि बढाउन काम गरिरहेका छौं। हामी आर्थिक हिसाबले नाजुक अवस्थामा रहेको देशलाई माथि उठाउने काम गर्दैछौं।”

उनी थपे, “देशलाई सुशासन दिनुछ, भ्रष्टाचारमुक्त बनाउनेछौं। भ्रष्टाचार गर्ने कसैलाई पनि काम र अपराध हेरेर कारबाही गरिन्छ। कर्मचारीहरुले जनतालाई दुःख दिने मनसाय राख्नुपर्दैन।”