सरकारले समस्याग्रस्त सहकारीका साना बचतकर्तालाई तत्काल राहत दिने

सरकारले समस्याग्रस्त सहकारी संस्थामा बचत गर्ने साना बचतकर्तालाई तत्काल राहत प्रदान गर्ने भएको छ। आगामी आर्थिक वर्ष २०८२/८३ का लागि राष्ट्रपति रामचन्द्र पौडेलले संसदमा प्रस्तुत गरेका सरकारका नीति तथा कार्यक्रममार्फत यसबारे जानकारी दिइएको हो।

उनका अनुसार सहकारी क्षेत्रको नीतिमा पुनरावलोकन गरिनेछ र नयाँ राष्ट्रिय सहकारी नीति ल्याइनेछ। सहकारी क्षेत्रका समस्या समाधान गर्न “राष्ट्रिय नियामक प्राधिकरण” मार्फत विशेष कोष स्थापना गरिनेछ।

त्यसैगरी, सहकारी सूचना केन्द्र र ऋण असुली न्यायाधिकरण स्थापना गरिने योजना छ। साथै, सहकारीसम्बन्धी तथ्यांक व्यवस्थापनलाई प्रभावकारी बनाउन विद्युतीय प्रणालीको मापदण्ड तय गरिनेछ। सहकारी र गरिबी निवारणसम्बन्धी व्यवस्थापन प्रणालीलाई समेत स्तरोन्नति गरिने राष्ट्रपति पौडेलले बताएका छन्।