प्राविधिक शिक्षा तथा व्यावसायिक तालिम परिषद् (सीटीईभीटी)ले शैक्षिक सत्र २०८३/०८४ का लागि डिप्लोमा, प्रमाणपत्र तथा प्रि-डिप्लोमा तहका विभिन्न शैक्षिक कार्यक्रमहरूमा निःशुल्क छात्रवृत्ति कोटामा विद्यार्थी भर्नाका लागि आवेदन आह्वान गरेको छ।
परिषद्का अनुसार देशभरका आङ्गिक, साझेदारी, सामुदायिक तथा निजी शिक्षण संस्थामा गरी कुल ३,४९७ सिटमा छात्रवृत्ति उपलब्ध गराइएको छ, जसमा डिप्लोमा तहका लागि ३,४१७ र प्रि-डिप्लोमाका लागि १,०६५ कोटा छुट्याइएको छ।
इच्छुक विद्यार्थीहरूले २०८३ जेठ १३ गते राति ११:५९ बजेसम्म सीटीईभीटीको आधिकारिक पोर्टलमार्फत अनलाइन आवेदन दिन सक्नेछन्, जसका लागि डिप्लोमा तहमा १,००० रुपैयाँ र प्रि-डिप्लोमामा ५०० रुपैयाँ शुल्क तोकिएको छ।
नर्सिङ कार्यक्रमका लागि न्यूनतम २.० GPA र अन्य कार्यक्रमका लागि १.६ GPA आवश्यक पर्ने प्रावधान राखिएको छ भने सरकारी वा सामुदायिक विद्यालयका विद्यार्थीलाई अतिरिक्त १ अंक प्रदान गरिनेछ। छनोट प्रक्रिया पूर्ण रूपमा योग्यताक्रममा आधारित हुनेछ र विभिन्न आरक्षण कोटा समेत लागू गरिएको छ, जसमा महिलासहित आदिवासी जनजाति, मधेसी, दलित तथा अन्य लक्षित समूहका लागि विशेष सिट व्यवस्था गरिएको छ।
आवेदन गर्दा शैक्षिक प्रमाणपत्र, नागरिकता वा जन्मदर्ता, लक्षित वर्गका कागजात तथा फोटो अनिवार्य रूपमा अपलोड गर्नुपर्नेछ। नतिजा प्रकाशित भएपछि छनोट भएका विद्यार्थीले १० दिनभित्र सम्बन्धित शिक्षालयमा भर्ना हुनुपर्नेछ र अध्ययन अवधिभर कुनै पनि अतिरिक्त शुल्क लिन नपाइने स्पष्ट व्यवस्था गरिएको छ।
Ads
![ज्याला मजदुरी गर्दै पढे; सेयर बजारले भाग्य बदल्यो: तिलक कोइराला [भिडियोसहित]](https://bajarkochirfar.com/wp-content/uploads/2026/10/HOygnA4BXX4-maxresdefault-150x150.jpg)
प्रतिकृया