सुनसरीमा ११० उम्मेदवारद्वारा मनोनयन दर्ता

आगामी फागुन २१ गते हुने प्रतिनिधिसभा सदस्य निर्वाचनका लागि सुनसरीको चारवटै निर्वाचन क्षेत्रमा ११० उम्मेदवारले उम्मेदवारी दर्ता गरेका छन्।

सदरमुकाम इनरुवास्थित शिक्षा तामिल केन्द्रमा क्षेत्र नं–२ र ४ को मनोनयन दर्ता सम्पन्न भएको हो भने क्षेत्र नं १ को धरान तथा क्षेत्र नं ३ को दुहबीस्थित निर्वाचन अधिकृतको कार्यालयमा मनोनयन दर्ता सम्पन्न भएको हो। क्षेत्र नम्बर १ मा २६ जना, क्षेत्र नम्बर २ मा २८, क्षेत्र नम्बर ३ मा २२ तथा क्षेत्र नम्बर ४ मा ३४ जनाले उम्मेदवारी दर्ता गरेका छन् भन्ने निर्वाचन अधिकृतको कार्यालयले जनाएको छ।

Ads

Ads

Ads

क्षेत्र नं १ बाट श्रम संस्कृति पार्टीबाट हर्कराज राई (हर्क साम्पाङ), नेपाली कांग्रेसबाट सुजेन्द्र तामाङ, नेकपा (एमाले)बाट टीका माङ्लेन, नेपाली कम्युनिष्ट पार्टीबाट सूर्यबहादुर भट्टराई, राष्ट्रिय स्वतन्त्र पार्टी (रास्वपा)बाट गोमा तामाङ, राष्ट्रिय प्रजातन्त्र पार्टी (राप्रपा)बाट उद्धव श्रेष्ठलगायतले उम्मेदवारी दर्ता गरेका छन्। यस क्षेत्रमा २६ जनाको उम्मेदवारी दर्ता भएको छ।

क्षेत्र नं २ मा २८ जनाले उम्मेदवारी दर्ता गरेका छन्। सहायक निर्वाचन अधिकृत अरुण मेहताका अनुसार यस निर्वाचन क्षेत्रमा नेपाली कांग्रेसबाट राजीव कोइराला, एमालेबाट सुजन लामा, रास्वपाबाट लालविक्रम थापा, नेकपाबाट रामकुमारी चौधरी र इकवाल अहमदले स्वतन्त्रतर्फबाट उम्मेदवारी दर्ता गरेका छन्।

सुनसरी क्षेत्र नं ३ बाट २२ जनाले उम्मेदवारी दर्ता गरेका छन्। नेपाली कांग्रेसबाट विजयकुमार गच्छदार, नेकपा (एमाले) बाट भगवती चौधरी, राष्ट्रिय स्वतन्त्र पार्टी (रास्वपा)बाट अशोककुमार चौधरीलगायतले उम्मेदवारी दर्ता गरेका छन्।

Ads

क्षेत्र नम्बर ४ मा विभिन्न राजनीतिक दलबाट ३४ जनाले उम्मेदवारी दर्ता गरेका छन्। यस निर्वाचन क्षेत्रमा नेपाली कांग्रेसबाट ज्ञानेन्द्रबहादुर कार्की, नेकपा (एमाले) बाट जगदीश कुशियत, नेकपाबाट मोहमद महफुज अन्सारी, रास्वपाबाट दिपककुमार साह, जनता समाजवादी पार्टी नेपालबाट सविता यादवलगायतले उम्मेदवारी दर्ता गरेका छन् भन्ने मुख्य निर्वाचन अधिकृत प्रकाश राउतले जानकारी दिएका छन्।

सुनसरीमा पाँच लाख ८० हजार ९४५ मतदाता कायम भएका छन्। जिल्लामा दुई लाख ९४ हजार २५२ पुरुष, दुई लाख ८६ हजार ६९१ महिला र दुई तेस्रोलिङ्गी मतदाता कायम छन् भन्ने मुख्य निर्वाचन अधिकृत राउतले जानकारी दिएका छन्।