खाद्य व्यवस्था तथा व्यापार कम्पनीले यसपटकको दसैंका लागि १५ सय गोटा खसीबोका र तीन सय च्याङ्ग्रा मात्र ल्याउने योजना बनाएको छ। अघिल्लो वर्षको तुलनामा यो संख्या आधाभन्दा धेरैले घटाइएको हो। गत वर्ष कम्पनीले ३ हजार खसीबोका र करिब एक हजार च्याङ्ग्रा ल्याए पनि धेरै बिक्री नभएको र मौसमसँग मिल्न नसक्दा धेरै खसीबोका मरेपछि कम्पनीले ठूलो घाटा बेहोरेको थियो। यसपटक यस्तो समस्या दोहोरिन नदिन खसीबोका र च्याङ्ग्राको परिमाण घटाउने निर्णय गरिएको हो।
कम्पनीले यसपालि खसीबोका खरिदका लागि ४ करोड रुपैयाँ मात्र बजेट छुट्याएको छ, जुन अघिल्लो वर्षको तुलनामा धेरै कम हो। अघिल्लो वर्ष खसीबोका र च्याङ्ग्राको खरिद तथा ढुवानीका लागि ३३ करोड रुपैयाँभन्दा बढी बजेट छुट्याइएको थियो। यस वर्ष बजेट र परिमाण दुवै घटाइएको कारणले कम्पनीलाई घाटा कम गर्ने प्रयास गरिएको छ।
खसीबोकाको स्रोतका रूपमा मध्य र पश्चिम नेपालका क्षेत्रहरू, विशेष गरी हेटौंडा, दाङ र तुल्सीपुर चयन गरिएको छ भने च्याङ्ग्रा भने माथिल्लो डोल्पा र मुस्ताङबाट ल्याउने तयारी छ। यसका लागि सार्वजनिक टेन्डर आह्वान गर्ने प्रक्रिया अघि बढाइएको छ। खसीबोका खरिदका क्रममा सम्बन्धित जिल्लाका प्रमुख जिल्ला अधिकारी (सीडीओ) को रोहबरमा स्थानीय उपभोक्ता संरक्षण समितिको सहभागिता रहनेछ, जसले बजार मूल्य निर्धारण गर्नेछ।
बिक्रीका क्रममा खसीबोका र च्याङ्ग्राको मूल्य बजारमा विद्यमान मूल्यभन्दा प्रतिकिलो १० देखि १५ रुपैयाँ छुट दिएर निर्धारण गरिनेछ। यसरी छुट दिएर उपभोक्तालाई सस्तो मूल्यमा खसीबोका र च्याङ्ग्रा उपलब्ध गराउन कम्पनीले योजना बनाएको छ।
प्रतिकृया