काठमाडौंका ७ स्थानबाट आज एलपी ग्यास बिक्री हुँदै, कहाँ कुन ग्यास पाइन्छ?

खाना पकाउने ग्यासको अभाव झेलिरहेका उपभोक्तालाई लक्षित गर्दै नेपाल आयल निगमले आज काठमाडौंका ७ स्थानबाट एलपी ग्यास सिलिन्डर बिक्री गर्ने भएको छ।

जिल्ला प्रशासन कार्यालय काठमाडौं र नेपाल आयल निगमको समन्वयमा ग्यास उद्योगीमार्फत बिहान ११ बजेदेखि साँझ ५ बजेसम्म तोकिएका स्थानबाट विभिन्न ब्रान्डका ग्यास बिक्री गरिनेछ।

Ads

Ads

Ads

निगमका अनुसार टेकुस्थित निगम परिसरबाट नेपाल, एचपी, एभरेष्ट/सुगम, श्रीराम र सगर ग्यास बिक्री हुनेछ। पशु सेवा शाखा, चपली, बूढानीलकण्ठबाट नेपाल, एचपी र भानु ग्यास उपलब्ध हुनेछ।

त्यस्तै, राधास्वामी, कीर्तिपुर परिसरबाट नेपाल, एचपी, एभरेष्ट/सुगम, श्रीकृष्ण, साइवावा र श्रीमाया ग्यास बिक्री गरिनेछ। नयाँ बजार जुडो हल परिसरबाट नेपाल, एचपी र ओम ग्यास बिक्री हुनेछ।

तारकेश्वर नगरपालिका परिसरबाट नेपाल र एचपी तथा चन्द्रागिरी नगरपालिका कार्यालयबाट लोकप्रिय, नेपाल, एचपी र श्रीमाया ग्यास बिक्री गरिने निगमले जनाएको छ।

त्यसैगरी, राष्ट्रिय क्षयरोग केन्द्र, ठिमीबाट नेपाल, एचपी, सूर्य, सगर, एभरेष्ट/सुगम र एसटीसी ग्यास उपलब्ध हुनेछ।

निगमले एलपी ग्यासको आयात नियमित रूपमा भइरहेको र सम्बन्धित उद्योगहरूले आफ्ना विक्रेतामार्फत नियमित बिक्री गरिरहेको जनाएको छ। विक्रेताबाट ग्यास प्राप्त गर्न नसकेका अति आवश्यक उपभोक्ताले मात्र नागरिकता वा राष्ट्रिय परिचयपत्र लिएर तोकिएका बिक्री केन्द्रबाट ग्यास खरिद गर्न सक्नेछन्।