नेकपा एमालेका महासचिव शंकर पोखरेलले माओवादी केन्द्रका अध्यक्ष पुष्पकमल दाहाल प्रचण्डमाथि संसदीय मर्यादा विपरीत भ्रमपूर्ण अभिव्यक्ति दिएको आरोप लगाएका छन्।
बिहीबार सुर्खेत विमानस्थलमा पत्रकारहरूसँग कुरा गर्दै पोखरेलले प्रचण्डले संसदीय राजनीति र लोकतान्त्रिक मूल्यविपरीत अभिव्यक्ति दिएर भ्रम फैलाएको बताए । सरकारबाट बाहिरिएपछि प्रचण्डले कांग्रेस-एमाले मिलेर संविधानमा रहेका कमीकमजोरीका विषयमा गर्न खोजेको समीक्षालाई आम जनतामा भ्रमको विषय बनाएको पोखरेलले बताए ।
मुलुकमा दुई दलीय प्रणाली नभई राजनीतिक स्थायित्व र समृद्धिका लागि शक्तिशाली दुई दल आवश्यक रहेको उल्लेख गर्दै महासचिव पोखरेलले अन्य दल नै खोल्न नपाइने गलत भाष्य प्रचण्डले प्रयोग गरिरहेको बताए । पोखरेलले भने, “एमाले–कांग्रेसको संविधान संशोधनको उद्देश्य व्यवस्थालाई बलियो बनाउनु हो, न कि परिवर्तन उल्ट्याउनु।”
साथै, प्रचण्डले जिम्मेवार प्रतिपक्षीको भूमिका निर्वाह गर्न नसकेको आरोप लगाउँदै, उनले सत्ता नपाएको झोंकमा प्रचण्डले देशलाई बंगलादेश र श्रीलंका जस्तो बनाउने धम्की दिएको र यसबाट समाजमा अराजकता फैलाउन खोजेको बताए।
‘संकटबाट गुज्रिएको देशलाई सही बाटोमा ल्याउन एमाले–कांग्रेस मिलेका हुन्,’ महासचिव पोखरेलले भने, ‘लोकतन्त्रलाई सही दिशामा लैजान संविधानमा भएका अपूरा पक्षमाथि समीक्षा गर्न आवश्यक छ । अस्थिर राजनीति र यसबाट फैलिएको अराजकतालाई समाधान गरी राजनीतिक स्थायित्व कायम गर्ने र देशलाई समृद्धिको मार्गमा लैजान कांग्रेस–एमाले मिलेका हुन् । यसमा कुनै दुई मत छैन ।’
प्रतिकृया