अमेरिकामा २०२५ मा स्नातक गर्न लागेका विद्यार्थीहरूले रोजगारी पाउने सम्भावना यो वर्ष तुलनात्मक रूपमा सकारात्मक देखिएको छ। राष्ट्रिय कलेज र रोजगारदाताको संघ (NACE) को एक अध्ययनले २०२५ मा कम्पनीहरुले २०२४ को तुलनामा ७.३ प्रतिशतले बढी स्नातक पढ्दै गरेका विद्यार्थीहरूलाई रोजगार दिने योजना रहेको देखाएको छ।
कोभिड महामारीपछिको समयमा श्रम बजार कमजोर बनेको थियो, जसले गर्दा नयाँ स्नातकका लागि रोजगारीका अवसर कम भएका थिए। तर अहिले रोजगारदाताहरूले आफ्नो योजना पुनःसन्तुलन गर्दै स्नातकलाई समेट्ने प्रयास गरिरहेका छन्। राष्ट्रिय कलेज र रोजगारदाताको संघ (NACE) का प्रमुख शौन भ्यानडरजिएल भन्छन्, “पछिल्लो वर्षको तुलनामा यो सुधार देखिनु राम्रो संकेत हो। यद्यपि, कम्पनीहरूले अहिले पनि सावधानीपूर्वक योजना बनाइरहेका छन्।”
अमेरिकी पत्रिका मार्केट वाचका अनुसार सबै क्षेत्रमा नयाँ स्नातकका लागि रोजगारीको अवसर समान रूपमा उपलब्ध हुनेछ भन्ने छैन। थोक व्यापार, सूचना प्रविधि, वित्तीय सेवा, बीमा, र रियल स्टेटजस्ता क्षेत्रमा नयाँ भर्ना दर बढ्ने अपेक्षा गरिएको छ। तर, इलेक्ट्रोनिक्स उत्पादन, लेखा फर्महरू, र व्यवस्थापन परामर्श सेवाहरूमा भने नयाँ कर्मचारीको भर्ना कम हुने अनुमान छ।
हालैको अध्ययनले नयाँ स्नातकले पहिलो रोजगारी पाउन पहिलेभन्दा बढी प्रयास गर्नुपर्ने। रोजगारीको प्रक्रिया लामो बन्ने र कम्पनीहरूले धेरै आवेदनहरूबाट छनोट गर्न समय लिने अवस्था रहेको देखाएको छ।शिक्षा, विज्ञान तथा प्रविधि मन्त्रालयका तथ्याङ्कअनुसार, आर्थिक वर्ष २०८०/८१ मा अमेरिकामा पढ्न जान १२ हजार २६१ नेपाली विद्यार्थीहरुले एनओसी (विदेश अध्ययन अनुमति पत्र) लिएका थिए।
एजेन्सी हरुको सहयोगमा
प्रतिकृया