सेयर किन्नु अघि Audit Report मा के के हेर्ने ? [भिडियो]

बजारको चिरफार प्रिमियम पोडकास्टमा चार्टर्ड अकाउन्टेन्ट संजिता नेपालले लगानीकर्ताहरूले वित्तीय विवरण अध्ययन गर्दा गर्ने सामान्य गल्तीहरूबारे महत्वपूर्ण कुरा राखेकी छन्। उनले अधिकांश लगानीकर्ताले कम्पनीको ब्यालेन्स सिट, नाफा-नोक्सान, क्यास फ्लो र ईपीएस, पीई रेसियो जस्ता सूचकहरू मात्र हेर्ने गरेको तर अडिट रिपोर्टलाई बेवास्ता गर्ने गरेको बताइन्।

उनका अनुसार कम्पनीको वास्तविक वित्तीय अवस्था बुझ्न अडिट रिपोर्टभित्र रहेको अडिटरको ‘अपिनियन’ (मत) अत्यन्तै महत्वपूर्ण हुन्छ। अडिटरले कम्पनीले दिएका विवरणको आधारमा आफ्नो निष्कर्ष प्रस्तुत गर्ने भएकाले त्यहाँ कम्पनीको जोखिम, कमजोरी र भविष्यसम्बन्धी संकेतहरू समेत समेटिएका हुन्छन्।

Ads

Ads

Ads

अडिट रिपोर्टमा सामान्यतया चार प्रकारका अपिनियन हुने—अनक्वालिफाइड, क्वालिफाइड, एड्भर्स र डिस्क्लेमर—बताउँदै उनले लगानीकर्ताले कम्तीमा पनि कुन प्रकारको अपिनियन दिइएको छ भन्ने बुझ्नुपर्ने बताइन्। साथै, कम्पनी ‘गोइङ कन्सर्न’ (दीर्घकालसम्म सञ्चालनमा रहन सक्ने अवस्था) मा छ कि छैन भन्ने संकेत पनि अडिट रिपोर्टमै उल्लेख हुने उनले स्पष्ट पारिन्।

नेपालले वित्तीय विवरण अध्ययन गर्दा नोट्स टु अकाउन्ट्स पनि उत्तिकै महत्वपूर्ण हुने उल्लेख गर्दै कम्पनीका नीतिहरू, लिगल केस, दायित्व र अन्य लुकेका जोखिमहरू त्यही भागमा खुलाइने बताइन्।

लगानीका सन्दर्भमा उनले छोटो र दीर्घकालीन लक्ष्य छुट्याउनुपर्ने सुझाव दिइन्। छोटो अवधिको ट्रेडिङ गर्नेहरूले प्राविधिक विश्लेषणमा ध्यान दिनुपर्ने भए पनि दीर्घकालीन लगानीकर्ताले कम्पनीको फन्डामेन्टल अवस्था, नाफा, रिजर्भ, कर्जा अवस्था र अनुपालन (कम्प्लायन्स) पक्ष हेर्नुपर्ने उनको भनाइ छ।

त्यस्तै, सानो आम्दानी भएका व्यक्तिहरूले पनि लगानी सुरु गर्न सक्ने उल्लेख गर्दै उनले जोखिम क्षमता (रिस्क एपेटाइट) अनुसार रकम विभाजन (डाइभर्सिफिकेसन) गर्नुपर्नेमा जोड दिइन्। सबै रकम एउटै क्षेत्रमा लगानी गर्नु जोखिमपूर्ण हुने भन्दै केही रकम सुरक्षित साधनमा राख्न पनि सुझाव दिइन्।

वित्तीय स्वतन्त्रता (फाइनान्सियल फ्रिडम) हासिल गर्न व्यक्तिगत लक्ष्य स्पष्ट हुनुपर्ने र अरूसँग तुलना नगरी आफ्नो क्षमता र रुचिअनुसार योजना बनाउनुपर्ने उनले बताइन्।

आगामी वर्षहरूमा नेपालमा कृषि, सूचना प्रविधि (आईटी) र आउटसोर्सिङ क्षेत्रले राम्रो सम्भावना बोकेको उल्लेख गर्दै उनले नीति सहयोग भएमा यी क्षेत्रले अर्थतन्त्रमा ठूलो योगदान दिन सक्ने धारणा राखिन्।