आज (बुधबार) एनएलजी इन्स्योरेन्स, नेशनल लाइफ इन्स्योरेन्स र बरुण हाइड्रोपावर कम्पनीका सेयरधनीहरूका लागि लाभांश तथा हकप्रद सेयर सुरक्षित गर्ने अन्तिम दिन हो। यी कम्पनीहरूले भोलि (जेठ २२) गते बुकक्लोज गर्दैछन्, त्यसैले आजसम्म नेप्सेमा सेयर किन्ने लगानीकर्ताले मात्र लाभांश र हकप्रद सेयरमा भाग लिन पाउनेछन्।

एनएलजी इन्स्योरेन्सले जेठ २९ गते, बिहीबार, १९ औं वार्षिक साधारण सभा बालुवाटारस्थित आम्रपाली ब्याङ्केटमा बिहान ११ बजे बोलाएको छ। सभाले २.५०% बोनस सेयर र ०.१३१५७९% नगद लाभांश वितरण गर्ने प्रस्तावसहित अन्य नियमित एजेन्डाहरू पारित गर्नेछ।

Ads

नेशनल लाइफ इन्स्योरेन्सको ३७ औं वार्षिक साधारण सभा असार ५ गते, बिहीबार, बिहान साढे १० बजे कम्पनीको केन्द्रीय कार्यालय, लाजिम्पाटमा हुनेछ। सभाले ५% बोनस र १०% नगद लाभांश वितरण गर्ने प्रस्तावसहित सञ्चालक निर्वाचन लगायत अन्य प्रस्ताव पारित गर्नेछ।

बरुण हाइड्रोपावरले १:१ अनुपातमा ५३ लाख ५८ हजार १५० कित्ता हकप्रद सेयर प्रतिकित्ता १०० रुपैयाँमा जारी गर्न लागेको हो। हकप्रद सेयरमा सहभागी हुन चाहनेले पनि आजभित्र सेयर खरिद गरिसक्नुपर्नेछ।