सबैभन्दा महंगो सेयर भएको युनिलिभरको प्रतिसेयर आम्दानी नै २००० बढी

युनिलिभर नेपालले चालु आर्थिक वर्षको दोस्रो त्रैमासमा ४७ करोड ७८ लाख रुपैयाँ खुद नाफा कमाएको छ । यो नाफा गत आर्थिक वर्षको भन्दा १३.४९ प्रतिशतले धेरै हो । गत वर्ष यसै अवधिमा कम्पनीले ४२ करोड १० लाख रुपैयाँ खुद नाफा कमाएको थियो ।

कम्पनीको सञ्चालन आम्दानी ५.५१ प्रतिशतले बढे सँगै नाफामा सुधार आएको हो । गत वर्ष १ अर्ब ८४ करोड रुपैयाँ सञ्चालन आम्दानी गरेको कम्पनीको सञ्चालन आम्दानी चालू आर्थिक वर्षमा बढेर १ अर्ब ९४ करोड रुपैयाँ पुगेको छ ।

हाल कम्पनीको सेयर पुँजी ९ करोड २१ लाख रुपैयाँ छ भने रिटेन्ड अर्निङमा ४ अर्ब १७ करोड रुपैयाँ जम्मा भएको छ । गत वर्ष यसै अवधिमा रिटेन्ड अर्निङ ३ अर्ब ७७ करोड रुपैयाँ रहेको थियो ।

कम्पनीको नाफासँगै प्रतिसेयर आम्दानी पनि बढेको छ । गत आर्थिक वर्ष २ हजार ७५ रुपैयाँ रहेको प्रतिसेयर आम्दानी बढेर २ हजार ९७ रुपैयाँ पुगेको छ । त्यस्तै, प्रतिसेयर नेटवर्थ पनि ४ हजार २१४ रुपैयाँबाट बढेर ४ हजार ६४१ रुपैयाँ कायम भएको छ ।