स्वरोजगार लघुवित्तले लाभांश प्रस्ताव पारित गर्न बोलायो साधारण सभा, बुकक्लोज कहिले ?

स्वरोजगार लघुवित्त वित्तीय संस्था लिमिटेडले गत आर्थिक वर्षको मुनाफाबाट प्रस्तावित लाभांश पारित गर्नका लागि सोह्रौँ वार्षिक साधारण सभा बोलाएको छ। सभा बैशाख २९ गते, नेपाल प्रज्ञा प्रतिष्ठान, कमलादीमा बिहान ११:३० बजे सुरु हुनेछ।

सभाले हालको चुक्ता पूँजीमा १३.५० प्रतिशत बोनस सेयर र त्यसको कर प्रयोजनार्थ ०.७१ प्रतिशत नगद लाभांश वितरण गर्ने प्रस्ताव पारित गर्नेछ। साथै, मर्जर तथा एक्विजिशनसम्बन्धी कार्य गर्न, प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने, र लेखापरीक्षक नियुक्त गर्ने जस्ता अन्य प्रस्तावहरू पनि सभामा पेस गरिनेछ।

लाभांश वितरण र साधारण सभा प्रयोजनार्थ लघुवित्तले बैशाख ११ गते बुकक्लोज गर्ने निर्णय गरेको छ। यसअनुसार बैशाख १० गतेसम्म नेप्सेमा कारोबार भएका सेयरधनीहरू सभामा सहभागी हुन र लाभांश प्राप्त गर्न योग्य हुनेछन्।