रुसका राष्ट्रपति भ्लादिमिर पुटिनले अमेरिकाका निर्वाचित राष्ट्रपति डोनाल्ड ट्रम्पले युक्रेनमा जारी युद्धलाई अन्त्य गर्न सक्ने विश्वास व्यक्त गरेका छन्। पुटिनले काजाकिस्तानको राजधानी अस्तानामा भएको सुरक्षा सम्मेलनमा भने, “राष्ट्रपति ट्रम्प एक समझदार र अनुभवी व्यक्ति हुन्। उनले यस युद्धलाई समाधान गर्न सक्छन्।”

यसअघि ट्रम्पले चुनावी अभियानका क्रममा युक्रेन युद्ध अन्त्य गर्ने वाचा गरेका थिए। उनले जुलाई २०२३ मा फक्स न्यूजलाई दिएको अन्तर्वार्तामा भनेका थिए, “म निर्वाचित भएको २४ घण्टामा यो युद्ध समाप्त गर्छु।”

केही रिपोर्टहरूका अनुसार, पुटिन र ट्रम्पबीच केही हप्ताअघि फोनमा वार्ता भएको थियो। उनीहरूले युद्ध समाधान र युरोपमा शान्ति स्थापनाको विषयमा छलफल गरेका थिए। ट्रम्पले पनि यसअघि पुटिनसँग राम्रो सम्बन्ध रहेको भन्दै आफूलाई यो युद्ध रोक्न सहज हुने बताएका थिए।

एजेन्सीहरुको सहयोगमा