इरानले खाडी क्षेत्रमा अमेरिका र इजरायलसँग सम्बन्धित बैंक तथा आर्थिक हितलाई लक्षित गर्ने चेतावनी दिएका बेला अन्तर्राष्ट्रिय बैंकहरूले सुरक्षा कदम कडा बनाएका छन्। यसै क्रममा सिटीग्रुप र स्ट्यान्डर्ड चार्टर्डले दुबईस्थित आफ्ना कार्यालयहरू खाली गर्न सुरु गरेका छन् र कर्मचारीलाई घरबाटै काम गर्न निर्देशन दिएका छन्।
सिटीग्रुपले दुबई अन्तर्राष्ट्रिय वित्तीय केन्द्र र ओउद मेथा क्षेत्रमा रहेका आफ्ना कार्यालयबाट कर्मचारीलाई बाहिर जान र घरबाट काम जारी राख्न निर्देशन दिएको रायटर्सले स्रोतसहित जनाएको छ।
अर्को सूचना नआएसम्म कर्मचारीले घरबाट काम गर्नुपर्नेछ। स्ट्यान्डर्ड चार्टर्डको संयुक्त अरब इमिरेट्समा ठूलो उपस्थिति रहेको छ। दुबई विश्वका प्रमुख वित्तीय केन्द्र मानिन्छ, जहाँ जेपीमर्गन, एचएसबीसी, स्ट्यान्डर्ड चार्टर्ड लगायत ठूला बैंकका कार्यालय छन्।
तेहरानस्थित खतम अल–अन्बिया सेनानीकेन्द्र का प्रवक्ताले अमेरिका र इजरायलसँग सम्बन्धित बैंकिङ तथा आर्थिक हितहरूलाई लक्षित गरिने बताएका छन्। इरानले अमेरिका र इजरायलको आक्रमणको जवाफमा मध्यपूर्वका विभिन्न क्षेत्रमा क्षेप्यास्त्र प्रहार गरेको थियो। यसका कारण जनधनको क्षति, हवाई र समुद्री यातायातमा अवरोध र यातायातमा ठूलो असुविधा देखिएको छ।
क्षेत्रीय द्वन्द्वले दुबईको सुरक्षित व्यापारिक केन्द्रको छविमा असर पारेको छ। लगानीकर्ता कम्पनीहरूले लगानी घटाउने, रोजगारी कटौती गर्ने वा सञ्चालन अन्यत्र सार्ने सम्भावना बढेको छ।
दुबईले सन् २००४ मा दुबई अन्तर्राष्ट्रिय वित्तीय केन्द्र स्थापना गरेपछि विश्वका वित्तीय संस्थाहरू आकर्षित हुँदै आएको थियो। सन् २०२५ को अन्त्यसम्म यस क्षेत्रमा २९० भन्दा बढी बैंक, १०२ हेज कोष, करिब ५०० सम्पत्ति व्यवस्थापन कम्पनी र १,२८९ परिवारसँग सम्बन्धित संस्था रहेका थिए।
प्रतिकृया