खलनायक बनेर इतिहासमा हराउन चाहन्नँ, देशलाई सही दिशा नदिएसम्म विश्राम लिन्नँ: प्रचण्ड

नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले आफूलाई खलनायक बनेर इतिहासमा हराउन नचाहेको बताएका छन्।

आइतबार साँझ जेनजी र राष्ट्रका नाममा सम्बोधन गर्दै प्रचण्डले भने, “यदि म धेरै अघि बिदा भएको भए, सायद देशले मलाई नायकको रूपमा मात्र सम्झिन्थ्यो होला। तर, म खलनायक बनेर इतिहासको पन्नामा हराउन चाहन्नँ। म यो देशलाई सही दिशामा नपुर्‍याएसम्म विश्राम लिने छैन।”

Ads

Ads

Ads

उनले जारी राखे, “तपाईंहरूले मलाई आज कुन रूपमा देख्नुहुन्छ, त्यो तपाईंहरूको स्वतन्त्रता र अधिकार हो। तर मेरो अभावमा मेरो उपस्थितिको महसुस तब हुनेछ, जब तपाईंहरूले मैले कोरेका परिवर्तनहरूलाई भोग्नुहुनेछ। म हार मान्न तयार छैन, किनभने मेरो काम अझै सकिएको छैन।”

संयोजक प्रचण्डले आफू नयाँ विचारहरूका लागि सधैं खुला रहेको र नयाँ पुस्तालाई स्वागत गर्न तयार रहेको पनि बताएका छन्। तर उनले हरेक चम्किलो चीज सधैं हिरा नहुने भएकाले सचेत रहन आग्रह गरे।

“आजको डिजिटल युगमा, सामाजिक सञ्जालका भ्रमहरूले तपाईंहरूलाई बहकाउन सक्छन्। कसैलाई तपाईंलाई सानो महसुस गराउन नदिनुहोस्,” उनले भने।

प्रचण्डले नवपुस्ताहरूलाई सधैं प्रश्न गर्न र उनीहरूको जिज्ञासा व्यक्त गर्न प्रोत्साहित गर्दै भने, “प्रश्न सोध्न नछोड्नुहोस्, म त्यसको जवाफ दिन तयार छु। मलाई अझ बढी दबाब दिनुहोस्, म त्यसको सामना गर्न तयार छु। किनकि मलाई थाहा छ, मेरो शक्तिको स्रोत तपाईंहरू नै हो।”

साथै, उनले भने कि अर्को २० वर्ष परीक्षण र त्रुटि गर्दै नयाँ नेताहरू जाँच्ने समय अब छैन। त्यसैले सबै मिलेर यस्तो नेपाल निर्माण गर्न आवश्यक छ, जहाँ “कुनै पनि युवाले आफ्नो भविष्य खोज्न विदेशिनु नपरोस्।”