अमेरिकामा अण्डाको सर्टेज, टर्कीले दिने भयो ७ सय कन्टेनर अण्डा

अमेरिका अहिले गम्भीर अण्डा संकटबाट जुझिरहेको छ, जुन मुख्य रूपमा बर्ड फ्लुको प्रकोपका कारण भएको हो। लाखौं कुखुरा मरेपछि अण्डाको मूल्य अचानक आकाशिएको छ। सुपरमार्केटहरूमा अण्डा नपाइने अवस्था आएको छ, र रेस्टुरेन्ट मालिकहरूले आफ्नो मेनुमा परिवर्तन गर्न बाध्य भएका छन्।

यस संकटका बीच, टर्कीले अमेरिकालाई १५ हजार टन अण्डा दिने निर्णय गरेको छ। टर्किको अण्डा उत्पादक केन्द्रीय संघका अध्यक्षले निर्यात प्रक्रिया सुरु भएको र जुलाईसम्म जारी रहने जानकारी दिएका छन्। दुई टर्की कम्पनीहरूले यो आपूर्ति ह्यान्डल गर्नेछन्, र जुलाइसम्ममा कुल ७०० कन्टेनर अण्डा अमेरिका पठाइनेछ।

सन् २०२२ देखि अमेरिका बर्ड फ्लुको प्रकोपसँग जुध्दै आएको छ, र यसमा १६.२ करोडभन्दा बढी कुखुरा, टर्की र अन्य चराचुरुङ्गी प्रभावित भएका छन्। यस प्रकोपको कारण अण्डाको अभाव अझ बढेको छ। युएस डिपार्टमेन्ट अफ एग्रीकल्चर (युएसडीए) ले यो रोग नियन्त्रण गर्न भ्याक्सिनको भण्डारण गरिरहेको छ, तर यसको व्यापक प्रयोग भने हालसम्म सुरु भएको छैन।

अण्डाको अभावलाई सम्बोधन गर्न अमेरिका अहिले टर्की जस्ता देशबाट अण्डा आयात गर्न बाध्य भएको छ। यस सम्झौताबाट टर्कीले लगभग २६ मिलियन डलर कमाउनेछ। टर्की पहिले नै संसारका शीर्ष १० अण्डा निर्यात गर्ने देशहरूमा पर्छ।