चीनको ‘नेसनल अफशोर आयल कर्पोरेसन’ (CNOOC) ले साउथ चाइना सीको पूर्वी क्षेत्रमा १० करोड टनभन्दा बढी तेल भण्डार भएको ठूलो तेल खानी पत्ता लगाएको जनाएको छ।
गुआङडोङ प्रान्तको शेन्जेनबाट करिब १७० किलोमिटर टाढा रहेको हुइझोउ १९–६ तेल क्षेत्रमा परीक्षण ड्रिलिङ गरिएको छ। CNOOC का अनुसार परीक्षणका क्रममा दैनिक ४१३ ब्यारेल कच्चा तेल र ६८ हजार घनमिटर प्राकृतिक ग्यास उत्पादन भएको छ।
CNOOC का प्रमुख कार्यकारी अधिकृत झोउ सिन्ह्वाईले दक्षिण चीन सागरको पूर्वी क्षेत्रमा तेल र ग्यास अन्वेषणमा निरन्तर सफलता मिलेको बताउँदै यसलाई अपतटीय तेल र ग्यास उत्पादन वृद्धि गर्न ठूलो उपलब्धि बताएका छन्।
CNOOC का प्रमुख भूगर्भविद् जु चाङगुईले यो खोजलाई “महत्वपूर्ण सफलता” भन्दै यस क्षेत्रलाई साउथ चाइना सीको उत्तरी भागमा सबैभन्दा ठूलो ‘क्लास्टिक होल’ तेल क्षेत्र प्रमाणित गरेको बताएका छन्।
अमेरिकी इनर्जी इन्फर्मेसन एडमिनिस्ट्रेसनका अनुसार दक्षिण चीन सागर क्षेत्रीय विवादका कारण कम अन्वेषण भएको भए पनि पत्ता लागेका धेरैजसो तेल र ग्यास क्षेत्रहरू अहिलेसम्म निर्विवादित भूमिमा छन्।
चीनले दक्षिण चीन सागरको अधिकांश भाग आफ्नो भएको दाबी गर्दै आएको छ, तर फिलिपिन्स, मलेसिया, भियतनाम, इन्डोनेसिया, र ब्रुनाईले यस क्षेत्रमा दाबी गर्दै आएका छन्, जसका कारण यो खोज भावी विवादको विषय बन्न सक्छ।
चीन हाल दैनिक १ करोड ११ लाख ब्यारेल कच्चा तेल आयात गर्ने विश्वकै सबैभन्दा ठूलो तेल आयातकर्ता हो। यो नयाँ तेल क्षेत्रको खोजले देशको ऊर्जा आपूर्तिमा आत्मनिर्भरता बढाउने र आयातमा निर्भरता घटाउने आशा गरिएको छ।
प्रतिकृया