नेपाल वायुसेवा निगमको आन्तरिक उडान किन बन्द भयो?
नेपाल वायुसेवा निगमको आन्तरिक उडान पूर्ण रूपमा बन्द भएको छ। आन्तरिक उडानका लागि प्रयोग भइरहेको अन्तिम ट्विनअटर जहाज पनि ग्राउन्डेड भएपछि सेवा ठप्प भएको हो।
निगमका अनुसार, दुईवटा ट्विनअटर जहाजमध्ये एक जहाज गत जेठदेखि नै ग्राउन्डेड अवस्थामा थियो। आइतबारबाट दोस्रो जहाजको इन्जिनको उडान आवर सकिएपछि आन्तरिक उडान सेवा पूर्ण रूपमा रोकिएको हो।
इन्जिनको उडान आवर समाप्त हुने जानकारी पहिल्यै प्राप्त भएर नयाँ इन्जिन अर्डर गरिएको भए पनि अहिलेसम्म डेलिभरी नभएको निगमले जनाएको छ। उपलब्ध इन्जिन प्रयोग गरेर उडान सञ्चालनको प्रयास असफल भएको निगमको भनाइ छ।