अण्डाको मूल्य एक हप्तामै दुईपटक बढ्यो, क्रेटको कति पुग्यो?

अण्डाको मूल्य एक हप्तामै दुईपटक बढाइएको छ। नेपाल लेयर्स कुखुरा पालक संघले शुक्रबारदेखि ठूलो र मिडियम साइजको अण्डाको मूल्य प्रतिक्रेट १५ रुपैयाँले वृद्धि गरेको छ।

यसअघि पुस ५ गते पनि प्रतिक्रेट १५ रुपैयाँले मूल्य बढाइएको थियो। यसरी, एक हप्तामा नै अण्डाको मूल्य प्रतिक्रेट ३० रुपैयाँले बढेको छ।

संघका अनुसार अब चितवनमा मिडियम अण्डाको मूल्य प्रतिक्रेट ५०० रुपैयाँ र ठूलो अण्डाको मूल्य प्रतिक्रेट ५१४ रुपैयाँ २९ पैसा तोकिएको छ। सात क्रेटको एक पेटी मिडियम अण्डाको मूल्य तीन हजार ५०० रुपैयाँ र ठूलो अण्डाको मूल्य तीन हजार ६०० रुपैयाँ हुनेछ।

चितवनबाट लोड भएर देशभरका बिक्री डिपोमा पुर्‍याउँदा प्रतिपेटी थप १४० रुपैयाँ लाग्ने संघले जनाएको छ, जसमा भाडा, कार्टुन र क्रेटको खर्च समावेश छ।