अब नबिल बैंकका ग्राहकहरूले एपबाट अपोइन्टमेन्ट बुक गर्न सक्ने

नबिल बैंकले अपोइन्टमेन्ट बैंकिङ प्रणालीको सुरुवात गरेको छ, जसले ग्राहकहरूको सुविधालाई ध्यानमा राख्दै व्यस्त समयको व्यवस्थापनमा सहयोग पुर्याउने छरितो सेवा प्रदान गर्ने लक्ष्य राखेको छ। यो प्रणाली अहिले नबिल बैंकको केन्द्रीय कार्यालय तीनधारामा लागू गरिएको छ।

बैंकका प्रमुख कार्यकारी अधिकृत, ज्ञानेन्द्रप्रसाद ढुंगानाले भने, “हामी ग्राहकहरूको आवश्यकता र चाहनालाई महसुस गर्दै नवीनतम समाधानहरू उपलब्ध गराउन प्रतिबद्ध छौँ। अपोइन्टमेन्ट बैंकिङ प्रणालीले हाम्रो उद्देश्यलाई प्रतिबिम्बित गर्दै समय व्यवस्थापन र कुशल सेवा प्रदान गर्ने कार्यमा सहयोग पुर्याउने छ।”

नबिल बैंकले व्यस्त पेसाकर्मी र व्यवसायीहरूलाई लक्षित गर्दै यस प्रणालीलाई पेश गरेको हो, जसमा ग्राहकले आफूले चाहेको समय र सेवाका अनुसार बैंकबाट सेवा लिन सक्छन्। यो सुविधा नगद र चेक कारोबार जस्ता अत्यावश्यक बैंकिङ सुविधाहरूमा लागू हुने छ।

नबिल बैंकले डिजिटल बैंकिङलाई प्राथमिकता दिँदै ग्राहकको अनुभवमा आधारित नयाँ प्रणालीहरूलाई अपनाइरहेको छ। अपोइन्टमेन्ट बैंकिङ प्रणालीलाई डिजिटलाइजेसनको नयाँ आयामको रूपमा प्रस्तुत गरिएको छ।

मुख्य विशेषताहरू:

१. समय व्यवस्थापनका लागि उपयुक्त: व्यस्त व्यक्तिहरू र व्यवसायीहरूलाई छिटो, कुशल र गुणस्तरीय सेवा प्रदान गर्न यो प्रणाली विशेष रूपमा डिजाइन गरिएको हो।

२. सहज बुकिङ प्रक्रिया: ग्राहकहरूले नबिल बैंकको वेबसाइट वा एनबैंक एप मार्फत सजिलै अपोइन्टमेन्ट बुक गर्न सक्ने सुविधा प्राप्त भएको छ।

ग्राहकहरूले बैंकमा जानु अघि नबिलको वेबसाइट वा एनबैंक एपमार्फत आफूलाई आवश्यक सेवा र समय छनोट गर्न सक्छन्, जसले समय व्यवस्थापनमा ठूलो सहयोग पुर्याउने विश्वास गरिएको छ। नबिल बैंकले हाल देशभरका २६८ शाखा र ३२० एटीएम मेसिनमार्फत २४ लाखभन्दा बढी सेवाग्राहीलाई सेवा प्रदान गर्दै आएको छ।