बजारमा तरलता धेरै भएपछि आज पनि ८० अर्ब रुपैयाँ झिक्दै राष्ट्र बैंक

बैंकिङ प्रणालीमा अत्यधिक तरलता थुप्रिएपछि नेपाल राष्ट्र बैंकले लगातार निक्षेप संकलन उपकरण प्रयोग गरी प्रणालीबाट पैसा तानिरहेको छ।

यसैक्रममा, राष्ट्र बैंकले आज साउन ७ गते फेरि बैंकिङ प्रणालीबाट ८० अर्ब रुपैयाँ निक्षेप संकलनमार्फत तान्ने भएको छ। तरलता व्यवस्थापनका लागि दिउँसो ३ बजे बोलकबोल प्रक्रिया सञ्चालन हुनेछ।

Ads

Ads

Ads

राष्ट्र बैंकका अनुसार निक्षेप दिन इच्छुक बैंक तथा वित्तीय संस्थाहरूले न्यूनतम १० करोड र अधिकतम ५ अर्ब रुपैयाँसम्म बोलकबोल गर्न सक्नेछन्। रकम भाग गर्दा बाँकी हिस्सा (निःशेष भाग) जान सक्ने गरी प्रस्ताव राख्नुपर्नेछ।

बोलकबोल ब्याजदरको आधारमा हुनेछ, र बहुब्याजदरमा बहुबोलकबोल गर्न पनि सकिनेछ। यस प्रक्रियामा ‘क’, ‘ख’ र ‘ग’ वर्गका बैंक तथा वित्तीय संस्थाहरू मात्र सहभागी हुन पाउनेछन्।

यो निक्षेप संकलन ५६ दिनको अवधिको हुनेछ, जसको साँवा तथा ब्याज असोज १ गते भुक्तानी गरिनेछ।

पछिल्लो समय कर्जाको माग नबढेकाले बैंकिङ प्रणालीमा अत्यधिक तरलता देखिएको हो। बैंक तथा वित्तीय संस्थाहरू झण्डै ३ प्रतिशत ब्याजदरमै केन्द्रीय बैंकलाई पैसा दिन बाध्य छन्।