भोलिदेखि आईपीओ निष्काशन गर्दै होटल फरेष्ट इन, क-कसले भर्न पाउने ?

होटल फरेष्ट इन लिमिटेडले भोलि माघ ४ गतेदेखि प्राथमिक सेयर (आईपीओ) निष्काशन गर्ने भएको छ। कम्पनीले पहिलो चरणअन्तर्गत वैदेशिक रोजगारीमा रहेका नेपाली नागरिकहरूका लागि आईपीओ जारी गर्न लागेको हो।

कम्पनीले गत पुस २० गते नेपाल धितोपत्र बोर्डबाट रु. १०० अंकित दरका ४० लाख कित्ता साधारण सेयर, कुल ४० करोड रुपैयाँ बराबरको आईपीओ निष्काशन गर्न अनुमति प्राप्त गरेको थियो। यसमध्ये १० प्रतिशत अर्थात् ४ लाख कित्ता साधारण सेयर वैदेशिक रोजगारीमा रहेका नेपाली नागरिकहरूका लागि बिक्री गरिनेछ।

Ads

Ads

Ads

वैदेशिक रोजगारीमा रहेका नेपालीहरूले न्यूनतम १० कित्ता र अधिकतम २ लाख कित्तासम्म आवेदन दिन सक्नेछन्। उक्त आईपीओ छिटोमा माघ ८ गते र ढिलोमा माघ १८ गतेसम्म निष्कासन तथा बिक्रीका लागि खुला रहनेछ।

आवेदन धितोपत्र बोर्डबाट स्वीकृति प्राप्त सम्पूर्ण आस्वा सदस्य बैंक तथा वित्तीय संस्थाहरू, तिनका तोकिएका शाखा कार्यालयहरू तथा ‘मेरो सेयर’ अनलाइन प्रणालीमार्फत दिन सकिनेछ।

कम्पनीको आईपीओ निष्काशन तथा बिक्री प्रबन्धकको रूपमा एनआईसी एशिया क्यापिटल लिमिटेड रहेको छ। पहिलो चरणमा वैदेशिक रोजगारीमा रहेका नेपालीहरूका लागि सेयर निष्काशन गरेपछि कम्पनीले दोस्रो चरणमा सर्वसाधारणका लागि आईपीओ जारी गर्ने जनाएको छ।