खल्तीका पूर्व सीईओ विनय खड्काले नयाँ फिनटेक स्टार्टअप ‘ट्रस्ट ब्रिज क्यापिटल’ स्थापना गरेका छन्। खड्काले यो कम्पनीमार्फत नेपालमा वित्तीय सेवा, लगानी र ऋण पहुँचलाई अझ सजिलो, पारदर्शी र डिजिटल बनाउने लक्ष्य राखेको बताए।
उनका अनुसार, ट्रस्ट ब्रिज क्यापिटलले ऋण लिने प्रक्रिया, लगानी योजना बनाउने तरिका र वित्तीय निर्णय लिनुपर्ने कामलाई प्रविधिमार्फत सरल बनाउने छ। कम्पनीले मोर्टगेज, डिजिटल लोन, क्यापिटल मार्केटका सेवा, बीमा तथा लगानीको प्रक्रिया सरलीकृत र डिजिटल बनाउने तयारी गरेको छ।
खल्तीका पूर्व सीईओ खड्का यसअघि खल्ती र आईएमई पेको मर्जरपछि बनेको संयुक्त कम्पनी आईएमई–खल्ती लिमिटेडका सीईओका रूपमा कार्यरत थिए। खल्तीमा उनको कार्यकाललाई युवामैत्री फिचरहरूको विकास, डिजिटल मनोरञ्जन सेवाहरूको विस्तार र खल्तीलाई ‘लाइफस्टाइल एप’को रूपमा स्थापित गर्न महत्वपूर्ण रहेको मानिन्छ।
सीईओ पदबाट बाहिरिएपछि उनले फिनटेक क्षेत्रमा नै आफ्नो नयाँ यात्रा सुरु गरेका हुन्।
प्रतिकृया