फर्स्ट माइक्रोफाइनान्सको त्रैमासिक रिपोर्ट कमजोर
फर्स्ट माइक्रोफाइनान्स लघुवित्त वित्तीय संस्था लिमिटेडले चालु आर्थिक वर्षको तेस्रो त्रैमाससम्म ७ करोड ६ लाख रुपैयाँ खुद नाफा कमाएको छ, जुन अघिल्लो वर्षको सोही अवधिको तुलनामा ४५.७७ प्रतिशतले थोरै हो। गत आर्थिक वर्षको सोही अवधिमा कम्पनीले १३ करोड २ लाख रुपैयाँ नाफा कमाएको थियो।
खुद ब्याज आम्दानी र सञ्चालन मुनाफा घट्दा नाफामा गिरावट आएको हो। खुद ब्याज आम्दानी ३७.९४ प्रतिशतले घटेर १५ करोड ७० लाख रुपैयाँ आएको छ भने खुद फि तथा कमिशन आम्दानी ८०.४७ प्रतिशत घटेको छ। यसका साथै, लघुवित्तको कुल सञ्चालन आम्दानी ४०.५९ प्रतिशत र सञ्चालन मुनाफा ४५.९४ प्रतिशत घटेको छ।
कम्पनीको खराब कर्जा अनुपात ३.१२ प्रतिशतबाट बढेर ४.७८ प्रतिशत पुगेको छ।
नाफामा गिरावटसँगै प्रतिशेयर आम्दानी पनि घटेर ७ रुपैयाँमा आएको छ भने प्रति शेयर नेटवर्थ १२६ रुपैयाँ ७२ पैसा रहेको छ ।
१ अर्ब ३४ करोड रुपैयाँ चुक्ता पूँजी भएको लघुवित्तको वितरणयोग्य नाफा ५ करोड १९ लाख रुपैयाँ पुगेको छ। यस्तै जगेडा कोषमा ५ करोड ३३ लाख रुपैयाँ छ।
