दुर्गा प्रसाईं राजसंस्था र हिन्दुराष्ट्र कायम गर्ने एजेण्डाका ब्राण्ड हुन्, नयाँ पार्टी उहाँकै नेतृत्वमा अघि बढ्नेछः धवलशमशेर राणा

राष्ट्रिय प्रजातन्त्र पार्टी परित्याग गरेका डा. धवलशमशेर राणाले राजसंस्था र हिन्दु राष्ट्रको एजेण्डालाई स्थापित गराउन आफूहरुले नयाँ राष्ट्रवादी पार्टी निर्माण गर्न लागेको बताएका हुन् ।

आईतवार काठमाडौंमा आयोजित राष्ट्रवादी पार्टी निर्माणार्थ जिम्मेवारी हस्तान्तरण तथा परिचयात्मक कार्यक्रममा बोल्दै उनले उक्त कुरा स्पष्ट पारेका हुन्। नेता राणाले नयाँ पार्टीको नेतृत्व राजा र हिन्दु राष्ट्रको एजेण्डालाई बोकेर निमुख जनताको नेता बनेको भन्दै दुर्गा प्रसाईले गर्ने पनि बताए । राजा र हिन्दु राष्ट्र बोकेको एजेण्डालाई लिएर देशव्यापी रुपमा निमुखा जनताको नेता भएको, ब्राण्ड भएकाले प्रसाईंले पार्टीको नेतृत्व गर्ने उनको भनाई थियो । नेता राणाले नयाँ बन्ने पार्टीले राजासहितको प्रजातन्त्र बोक्ने र हिन्दु राष्ट्र मुलुकमा कायम गरिछाड्ने संकल्प लिएको पनि बताए ।

उनले भने, ‘राजसंस्था र हिन्दु राज्यको एजेण्डालाई रेस्क्यू गर्नुपर्छ । र यो एजेण्डालाई रेस्क्यू गर्दा सबै राष्ट्रवादी, राजावादी एक ठाउँमा ल्याउनु पर्छ भन्ने क्रममा सबभन्दा पहिला दृष्टि हाम्रो दुर्गा प्रसाईंजी माथि गयो । उहाँ एउटा राजा र हिन्दु राष्ट्र बोकेको यो एजेण्डालाई लिएर देशव्यापी रुपमा निमुखा जनताको नेता हुनु भएको छ । एउटा ब्राण्ड हुनुभएको छ । र, उहाँ र हाम्रो सल्लाह मिलेको छ । उहाँ हाम्रो बाण्ड हुने, पार्टीको  नेता हुने र हामीले पार्टी चलाउने हो । र, भोलीको दिनमा जुन खाँचो छ नेपालका एउटा मजबुत राष्ट्रवादी शक्ति हामी निर्माण गर्न गईरहेका छौ । र, आजको उपस्थितिले र देशभरीबाट आएको सन्देश र संकेतहरुले पनि के सावित भईरहेको छ भने यो दुई तिन महिना भित्र नै यो एउटा मजुबत शक्तिको रुपमा नेपाली जनताको माझमा जानेछ ।’

नेता राणाले राप्रपाका अध्यक्ष राजेन्द्र लिङ्देनले राजासहितको प्रजातन्त्र र हिन्दुराष्ट्र कायम गर्ने एजेण्डालाई इमान्दारिताका साथ अघि नबढाएकाले आफूहरुले नयाँ पार्टी स्थापना गर्नुपर्ने अवस्था आएको जिकिर पनि गरे ।

–न्युज एजेन्सी नेपाल