राजस्व चुहावटमा शून्य सहनशीलता, अर्थमन्त्रीले दिए तत्काल कारबाहीको आदेश

उपप्रधानमन्त्री तथा अर्थमन्त्री विष्णुप्रसाद पौडेलले राजस्व संकलनमा सुधारका लागि थप मेहनत गर्न निर्देशन दिएका छन्। अर्थ मन्त्रालयका सचिव र विभागीय प्रमुखहरूको बैठकमा उनले औसतभन्दा बढी कार्यसम्पादन गर्न र मातहतका कर्मचारीहरूलाई सक्रिय रूपमा काममा लगाउन जोड दिए।

अर्थमन्त्री पौडेलले सामान्य कार्यशैलीले सीमित परिणाम दिने भन्दै, गत वर्षको तुलनामा १३ प्रतिशत राजस्व वृद्धि पर्याप्त नभएको उल्लेख गरे। संविधान र राष्ट्रको हितलाई प्राथमिकतामा राख्दै कानुनअनुसार करदाताबाट राजस्व संकलन गर्न र समस्याहरू तत्काल समाधान गर्न उनले आग्रह गरे।

Ads

राजस्व चुहावट रोक्न सुरक्षा निकाय लगायतका विभिन्न विभागहरूसँग समन्वय गर्न निर्देशन दिँदै, राजस्व संकलनमा कमजोरी गर्नेहरूलाई तत्काल कारबाही गर्नुपर्ने बताएका छन्। पौडेलले नीतिगत, संरचनागत, र प्रक्रियागत सुधारका लागि नेतृत्वद्वारा सहयोग प्रदान गरिने बताए।

बैठकमा अर्थ सचिव, राजस्व सचिव, राजस्व महाशाखा प्रमुख, भन्सार विभागका महानिर्देशक, र आन्तरिक राजस्व विभागका महानिर्देशकसहित अन्य वरिष्ठ अधिकारीहरूको उपस्थिति रहेको थियो।